ஆப்பிரிக்காவில் தமிழகத்தைச் சேர்ந்த 2 என்ஜினியர்கள் உட்பட 7 பேர் கடற்கொள்ளையர்களால் கடத்தப்பட்ட சம்பவம் பெரும் அதிர்ச்சியை ஏற்படுத்தியுள்ளது.
தேனி மாவட்டத்தைச் சேர்ந்த லட்சுமண பிரதீப் முருகன், தனியார் கப்பல் நிறுவனத்தில் அதிகாரியாக கடந்த 3 ஆண்டுகளாக பணியாற்றி வருகிறார். சமீபத்தில், அவர் கேமரூனுக்குச் செல்லும் ஒரு கப்பலில், கரூரைச் சேர்ந்த சதிஷ்குமார் செல்வராஜ், பீகாரைச் சேர்ந்த சந்தீப் குமார் சிங், கேரளாவைச் சேர்ந்த ராஜீந்திரன் மற்றும் ருமேனியாவைச் சேர்ந்த 3 பேருடன் இணைந்து பயணித்தார்.
மார்ச் 17 ஆம் தேதி, மத்திய ஆப்பிரிக்காவில் வடகிழக்கு சாண்டோ அன்டோனியா பிரின்ஸ் பகுதியில், கப்பல் 40 கடல் மைல் தொலைவில் செல்லும் போது, பயங்கர ஆயுதங்களுடன் வந்த கடற்கொள்ளையர்கள் முற்றுகையிட்டனர். அதை உணர்ந்த லட்சுமண பிரதீப் முருகன் மற்றும் பிற குழுவினர், கப்பலில் இருந்த எச்சரிக்கை மணியை செயல்படுத்தினர். எனினும், கொள்ளையர்கள் அதற்குள் கப்பலுக்குள் நுழைந்து, அனைவரையும் பிணை கைதிகளாக பிடித்து வைத்தனர்.
இந்த தகவல், லட்சுமண பிரதீப் முருகனின் சகோதரர் ராம் பிரவீனுக்கு தெரிவிக்கப்பட்டது. இதுகுறித்து அவர் தெரிவித்தது:
“மார்ச் 18 ஆம் தேதி, சம்பந்தப்பட்ட கப்பல் நிறுவனம் எங்களை தொடர்புகொண்டு கடத்தல் குறித்து தெரிவித்தது. அதன்பிறகு, அவர்களின் நிலைமை குறித்து எந்த தகவலும் இல்லை. அதிகாரிகள் மீட்பு முயற்சியில் ஈடுபட்டுள்ளதாக கூறினாலும், எங்களுக்கு எந்த உறுதியளிப்பும் இல்லை. மத்திய அரசு உரிய நடவடிக்கைகளை எடுத்து, அனைவரையும் பாதுகாப்பாக மீட்க வேண்டும்.”
இந்த சம்பவம் கடற்பயணிகள் பாதுகாப்பில் புதிய கேள்விகளை எழுப்பியுள்ளது.