புது தில்லியில் ஏப்ரல் 28 முதல் 30 வரை வெளியுறவு அமைச்சகத்தால் ஏற்பாடு செய்யப்பட்ட 11வது தூதரகத் தலைவர்கள் மாநாட்டில் திரு மோடி உரையாற்றினார். இந்த ஆண்டு மாநாடு, “2047-ஆம் ஆண்டுக்கான இந்திய ராஜதந்திரத்தை சீர்திருத்துதல்” என்ற கருப்பொருளை மையமாகக் கொண்டிருந்தது.
வர்த்தகம், தொழில்நுட்பம் மற்றும் மூலோபாய கூட்டாண்மைகளை மேம்படுத்துவதன் மூலமும், வெளிநாடு வாழ் இந்தியர்களுடனான தொடர்பை ஆழப்படுத்துவதன் மூலமும் இந்தியாவின் உலகளாவிய ஈடுபாட்டை வலுப்படுத்த வேண்டும் என்று பிரதமர் நரேந்திர மோடி அழைப்பு விடுத்துள்ளார். தனது உரையில், பிரதமர் தனது எண்ணங்களையும் கருத்துக்களையும் பகிர்ந்துகொண்டதோடு, 2047-ஆம் ஆண்டுக்குள் ‘விக்ஷித் பாரத்’ இலக்கை அடைவதற்கான இந்தியாவின் ஈடுபாடு குறித்த வழிகாட்டுதலையும் வழங்கினார். எதிர்காலத்திற்குத் தயாரான செயலாண்மைத் திறம், 3T-க்களை (வர்த்தகம், தொழில்நுட்பம் மற்றும் சுற்றுலா) ஊக்குவித்தல், மற்றும் ‘பாரதக் கதையை’ மேம்படுத்துதல் ஆகியவை குறித்தும் பிரதமருக்கு விளக்கவுரைகள் அளிக்கப்பட்டன.
வெளியுறவு அமைச்சர் எஸ். ஜெய்சங்கர் ஏப்ரல் 29 அன்று தொடக்கவுரை ஆற்றினார். கடந்த பத்தாண்டுகளில் உலக நாடுகளுடனான இந்தியாவின் ஈடுபாடு கணிசமாக விரிவடைந்துள்ளதை தங்களது கலந்துரையாடல் அங்கீகரித்ததாக டாக்டர் ஜெய்சங்கர் கூறினார். நிலையற்ற மற்றும் கொந்தளிப்பான உலகில், தேசிய நலனை முன்னெடுத்துச் செல்லவும், தேசிய இலக்குகளைப் பாதுகாக்கவும் இந்தியா தயாராக உள்ளது என்று அமைச்சர் கூறினார்.
மூன்று நாள் மாநாட்டின் போது, தூதரகத் தலைவர்கள் யோகா, ஆலோசனைக் கூட்டங்கள், மேசைப் பயிற்சிகள் மற்றும் பல்வேறு புவிசார் அரசியல் நிகழ்வுகள், வளர்ந்து வரும் தொழில்நுட்பங்கள், 3T-கள் (வர்த்தகம், தொழில்நுட்பம் மற்றும் சுற்றுலா), பாரத வரலாறு மற்றும் எதிர்காலத்திற்குத் தயாரான செயலாண்மைத் திறம் ஆகியவற்றை உள்ளடக்கிய கருப்பொருள் கலந்துரையாடல்களில் பங்கேற்றனர்.