இரு நாடுகளுக்கும் இடையிலான நெருங்கிய பாதுகாப்பு உறவை உறுதிப்படுத்தும் வகையில், இலங்கை இராணுவத்திற்கு 5.5 மில்லியன் அமெரிக்க டாலர் மதிப்பிலான இராணுவத் தளவாடங்களை இந்தியா இலவசமாக வழங்கியுள்ளது. இந்திய அரசின் பாதுகாப்பு அமைச்சகத்தால் அங்கீகரிக்கப்பட்ட இந்த உதவி, இலங்கை இராணுவத்தின் அவசரத் தேவையைப் பூர்த்தி செய்வதற்காக இந்திய இராணுவத்தின் பயன்பாட்டிலுள்ள கையிருப்பிலிருந்து வழங்கப்பட்டது.
இராணுவத் தளவாடங்கள் இந்தியக் கடற்படைக் கப்பலான ‘சார்தா’ (INS Sharda) மூலம் கொழும்புக்குக் கொண்டு வரப்பட்டன. அதிகாரப்பூர்வமாக ஒப்படைக்கும் நிகழ்வில், இலங்கைக்கான இந்திய உயர்ஸ்தானிகர் சந்தோஷ் ஜா, இலங்கையின் பாதுகாப்புச் செயலாளர் ஏர் வைஸ் மார்ஷல் (ஓய்வுபெற்ற) சம்பத் துயகோந்தா மற்றும் இலங்கை இராணுவத் தளபதி லெப்டினன்ட் ஜெனரல் லசந்த ரோட்ரிக்ோ ஆகியோர் கலந்துகொண்டனர்.
கடந்த இரண்டு ஆண்டுகளில், இலங்கைக்கான ஐந்து பில்லியன் இலங்கை ரூபாய் மதிப்பிலான பாதுகாப்பு சார்ந்த திட்டங்களுக்கு இந்தியா ஒப்புதல் அளித்துள்ளது. உள்கட்டமைப்பு மேம்பாடு, இராணுவ உபகரணங்கள் வழங்கல் மற்றும் இலங்கை ஆயுதப் படைகளின் திறனை மேம்படுத்துவதை நோக்கமாகக் கொண்ட பயிற்சி உதவிகள் ஆகியவை இத்திட்டங்களில் அடங்கும்.
‘டித்வா’ (Ditwah) சூறாவளி நிவாரண நடவடிக்கைகளின் போது, ஒரு கள மருத்துவமனை மற்றும் பொறியியல் பணிக்குழுவை (engineering task force) அனுப்பி இலங்கைக்கான மனிதாபிமான உதவிகளையும் இந்தியா வழங்கியிருந்தது. இந்த உதவிகள் இந்தியாவின் ‘அண்டை நாடுகளுக்கு முன்னுரிமை’ (Neighbourhood First) கொள்கையையும், ‘மகாசாகர்’ (MAHASAGAR) தொலைநோக்குப் பார்வையின் கீழ் பிராந்திய பாதுகாப்பு, ஸ்திரத்தன்மை மற்றும் ஒத்துழைப்பை மேம்படுத்துவதில் இந்தியா கொண்டுள்ள தொடர்ச்சியான அர்ப்பணிப்பையும் பிரதிபலிக்கின்றன.