புரட்சியாளரும் ‘ஷஹீத்-ஏ-ஆசம்’ (தியாகிகளின் தலைவன்) என்று போற்றப்படுபவருமான பகத் சிங்கின் 119-வது பிறந்தநாளை தேசம் இன்று கொண்டாடுகிறது.
1907-ஆம் ஆண்டு இதே நாளில், தற்போது பாகிஸ்தானில் உள்ள பஞ்சாபின் லயல்பூர் மாவட்டத்தில் உள்ள பங்கா கிராமத்தில் பகத் சிங் பிறந்தார். புரட்சியாளர் குடும்பத்தில் பிறந்த பகத் சிங், ஏழு உடன்பிறப்புகளில் இரண்டாவது குழந்தையாவார். அவர் அன்புடன் ‘பகன்வாலா’ (அதிர்ஷ்டசாலி என்று பொருள்படும்) என்று அழைக்கப்பட்டார். ராஜகுரு மற்றும் சுக்தேவ் ஆகியோருடன் இணைந்து நாட்டின் விடுதலைக்காகத் தன் உயிரைத் தியாகம் செய்ததன் மூலம் அவர் தனது பெயருக்கேற்றவாறு வாழ்ந்து காட்டினார்.
அவரது பிறந்தநாளைக் கொண்டாடும் வகையில், லூதியானாவில் உள்ள பஞ்சாப் வேளாண் பல்கலைக்கழகத்தில் ‘ஜஷ்ன்-ஏ-இன்குலாப்’ (புரட்சிக் கொண்டாட்டம்) என்ற மாநில அளவிலான நிகழ்ச்சிக்கு ஏற்பாடு செய்யப்பட்டுள்ளது. மேலும், அந்த மண்ணின் மைந்தரான அவருக்கு மரியாதை செலுத்த, ‘ஷஹீத் பகத் சிங் நகர்’ மாவட்டத்தில் உள்ள அவரது சொந்த கிராமமான கட்கர் கலானுக்கு மக்கள் சென்று வருகின்றனர்.
சுதந்திரப் போராட்ட வீரர் பகத் சிங்கின் பிறந்தநாளில் பிரதமர் நரேந்திர மோடி அவருக்கு அஞ்சலி செலுத்தினார். சமூக ஊடகப் பதிவு ஒன்றில், அசைக்க முடியாத துணிச்சல் மற்றும் வீரத்துடன் பகத் சிங் சுதந்திரப் போராட்டத்தில் புதிய ஆற்றலைப் புகுத்தினார் என்று பிரதமர் மோடி குறிப்பிட்டார். நாட்டின் கௌரவத்திற்காக அனைத்தையும் தியாகம் செய்த பகத் சிங்கின் மனப்பான்மை, இந்தியாவின் இளைஞர்களின் துணிச்சல் மற்றும் உறுதியின் அடையாளமாகத் திகழ்கிறது என்று பிரதமர் கூறினார். பகத் சிங்கிற்கு அஞ்சலி செலுத்தும் வகையிலான காணொளி ஒன்றையும் பிரதமர் மோடி பகிர்ந்துகொண்டார்.