பலூசிஸ்தானில், பாகிஸ்தானியப் படைகளின் சட்டத்திற்குப் புறம்பான நடவடிக்கைகளில் ஐந்து பொதுமக்கள் கொல்லப்பட்டனர்; மேலும் நால்வர் வலுக்கட்டாயமாகக் கடத்திச் செல்லப்பட்டு காணாமல் ஆக்கப்பட்டனர். ‘பலூச் யக்ஜெஹ்தி குழுவின்’ (BYC) தகவலின்படி, பஞ்ச்கூர் மாவட்டத்தில் பாகிஸ்தானின் ‘ஃபிரான்டியர் கார்ப்ஸ்’ (Frontier Corps) படையினரால் கடத்திச் செல்லப்பட்டதாகக் கூறப்படும் 17 வயது மாணவர் ஹதிம் பலூச்சின் உடல், சுமார் 11 நாட்களுக்குப் பிறகு மீட்கப்பட்டது.
அதே நாளில் நடந்த மற்றொரு தனிச் சம்பவத்தில், பாகிஸ்தானியப் படைகள் நான்கு பலூச் பொதுமக்களை ஒரு ‘நாடக மோதலில்’ (staged encounter) சுட்டுக் கொன்றதாகவும், அவர்கள் ஒரு நேரடிச் சண்டையில் கொல்லப்பட்டதாகக் கூறி, அவர்களின் உடல்களைப் பஞ்ச்கூர் மருத்துவமனைக்குக் கொண்டு சேர்த்ததாகவும் அந்த மனித உரிமை அமைப்பு வெளிப்படுத்தியது.
பலூசிஸ்தான் முழுவதும் நடைபெறும் மனித உரிமை மீறல்கள் குறித்துக் கடும் கவலை தெரிவித்த அந்த மனித உரிமை அமைப்பு, பலூச் மக்களின் படுகொலைகள் ஒரு கொடூரமான, திட்டமிட்ட ‘பலூச் இனப்படுகொலை’ என்று கூறியது. பஞ்ச்கூர் மாவட்டத்தில் மட்டும், கடந்த மூன்று மாதங்களில் சுமார் 40 பலூச் இளைஞர்கள் ஈவிரக்கமின்றி கொல்லப்பட்டு, அவர்களின் சிதைக்கப்பட்ட உடல்கள் வீசப்பட்டுள்ளதாக அந்த அமைப்பு தெரிவித்தது.