மேற்கு ஆசியாவில் நிலவும் நெருக்கடியால் ஏற்பட்ட இடையூறுகள் இருந்தபோதிலும், நாடு முழுவதும் வீட்டு உபயோக எல்பிஜி (LPG) விநியோகம் சீராகவே உள்ளது என்று அரசு இன்று தெரிவித்துள்ளது. புது தில்லியில் நடைபெற்ற அமைச்சகங்களுக்கு இடையிலான கலந்தாய்வுக் கூட்டத்தில் பேசிய பெட்ரோலியம் மற்றும் இயற்கை எரிவாயு அமைச்சகத்தின் செயலாளர் சுஜாதா சர்மா, எல்பிஜி விநியோகம் தொடர்ந்து இயல்பாகவே இருப்பதாகவும், நாடு முழுவதும் உள்ள விநியோக மையங்களில் எவ்விதமான இருப்புத் தட்டுப்பாடும் (dry-outs) ஏற்படவில்லை என்றும் கூறினார். வீடுகளுக்கு சுமார் 50 லட்சம் எல்பிஜி சிலிண்டர்கள் விநியோகிக்கப்பட்டதாக அவர் குறிப்பிட்டார். எல்பிஜி முன்பதிவுகளில் சுமார் 98 சதவீதம் தற்போது இணையம் வாயிலாகவே செய்யப்படுவதாகவும், 93 சதவீத விநியோகங்கள் ‘விநியோக அங்கீகாரக் குறியீடு’ (delivery authentication code) வழிமுறையின் மூலம் உறுதிப்படுத்தப்படுவதாகவும் திருமதி சர்மா மேலும் தெரிவித்தார்.
வணிக ரீதியிலான விநியோகத்தைப் பொறுத்தவரை, விநியோகச் சீரமைப்புப் பணிகள் சுமார் 70 சதவீதத்தை எட்டியுள்ளதாகவும், நேற்று மட்டும் சுமார் 8,200 டன் வணிக எல்பிஜி விற்பனை செய்யப்பட்டதாகவும் அவர் கூறினார். கடந்த மாதத்தின் 14-ஆம் தேதி முதல், 19 கிலோ எடையுள்ள 79 லட்சத்திற்கும் அதிகமான வணிக எல்பிஜி சிலிண்டர்கள் விற்பனை செய்யப்பட்டுள்ளன. பொதுத்துறை எண்ணெய் விற்பனை நிறுவனங்களின் ‘ஆட்டோ எல்பிஜி’ (வாகனங்களுக்கான எல்பிஜி) விற்பனை, பிப்ரவரி மாதத்தில் நாளொன்றுக்கு 177 டன்னாக இருந்த நிலையில், ஏப்ரல் மாதத்தில் நாளொன்றுக்கு சுமார் 296 டன்னாக உயர்ந்துள்ளதாகவும், இது 67 சதவீத வளர்ச்சியைக் குறிப்பதாகவும் அவர் சுட்டிக்காட்டினார். மேலும், இதுவரை 5 கிலோ எடையுள்ள 16.5 லட்சத்திற்கும் அதிகமான எல்பிஜி சிலிண்டர்கள் விற்பனை செய்யப்பட்டுள்ளன.
துறைமுகங்கள், கப்பல் போக்குவரத்து மற்றும் நீர்வழிகள் அமைச்சகத்தின் கூடுதல் செயலாளர் முகேஷ் மங்கல் பேசுகையில், கடற்பணியினரின் நலனையும், தடையற்ற கடல்சார் செயல்பாடுகளையும் உறுதி செய்வதற்காக, வெளியுறவு அமைச்சகம், இந்தியத் தூதரகங்கள் மற்றும் கடல்சார் துறையைச் சார்ந்த பங்குதாரர்களுடன் தங்கள் அமைச்சகம் தொடர்ந்து ஒருங்கிணைந்து செயல்பட்டு வருவதாகத் தெரிவித்தார். அப்பிராந்தியத்தில் உள்ள அனைத்து இந்தியக் கடற்பணியினரும் பாதுகாப்பாக இருப்பதாகவும், கடந்த 24 மணி நேரத்தில் இந்தியக் கொடியிட்ட கப்பல்கள் சம்பந்தப்பட்ட எவ்விதமான அசம்பாவிதச் சம்பவங்களும் பதிவாகவில்லை என்றும் அவர் தெரிவித்தார்.
‘DigiShipping’ கட்டுப்பாட்டு அறை தொடங்கப்பட்டதிலிருந்து, 6,700-க்கும் மேற்பட்ட தொலைபேசி அழைப்புகளையும், சுமார் 14,000 மின்னஞ்சல்களையும் கையாண்டுள்ளதாக அவர் மேலும் கூறினார்; இதில் கடந்த 24 மணி நேரத்தில் பெறப்பட்ட 147 அழைப்புகள் மற்றும் 276 மின்னஞ்சல்களும் அடங்கும். இதுவரை 2,400-க்கும் மேற்பட்ட இந்தியக் கடற்பணியினர் பாதுகாப்பாகத் தாயகம் திரும்புவதற்கு இந்த அமைச்சகம் வழிவகை செய்துள்ளது; இதில் கடந்த 24 மணி நேரத்தில் தாயகம் திரும்பிய 30 கடற்பணியினரும் அடங்குவர். வெளியுறவுத் துறையின் கூடுதல் செயலாளர் (வளைகுடா பிரிவு), அசெம் ஆர். மகாஜன், மேற்கு ஆசியப் பிராந்தியத்தில் நடைபெறும் நிகழ்வுகளைத் தங்கள் அமைச்சகம் தொடர்ந்து உன்னிப்பாகக் கண்காணித்து வருவதாகவும்; அங்கு வசிக்கும் பரந்த இந்தியச் சமூகத்தின் பாதுகாப்பு, உறுதிப்பாடு மற்றும் நலனை உறுதி செய்வதில் சிறப்பு கவனம் செலுத்தி வருவதாகவும் தெரிவித்தார். தகவல்களைப் பகிர்ந்துகொள்வதற்காக, மாநில அரசுகள் மற்றும் யூனியன் பிரதேசங்களுடன் அமைச்சகம் தொடர்ந்து தொடர்பில் இருப்பதாகவும் அவர் கூறினார்.
அமைச்சகத்தின் பிரத்யேகக் கட்டுப்பாட்டு அறை தொடர்ந்து இயங்கி வருவதாகவும், உரிய நேரத்தில் உதவிகளை வழங்கவும், பொதுமக்களின் கேள்விகளுக்குப் பதிலளிக்கவும் இந்தியத் தூதரகங்களுடன் ஒருங்கிணைந்து செயல்பட்டு வருவதாகவும் திரு. மகாஜன் மேலும் தெரிவித்தார். இந்தியத் தூதரகங்கள் அங்குள்ள இந்தியச் சமூகத்துடன் தீவிரமாக ஈடுபட்டு வருவதாகவும்; அப்பிராந்தியத்தில் செயல்படும் சங்கங்கள், அமைப்புகள், தொழில்முறை குழுக்கள் மற்றும் இந்திய நிறுவனங்களுடன் தொடர்ந்து கலந்துரையாடி வருவதாகவும் அவர் குறிப்பிட்டார்.
வான்வெளிப் போக்குவரத்து அனுமதிக்கப்பட்டுள்ள நாடுகளில் இருந்து விமானச் சேவைகள் தொடர்ந்து நடைபெற்று வருவதாகவும்; பிப்ரவரி 28-ஆம் தேதி முதல், அப்பிராந்தியத்திலிருந்து சுமார் 10 லட்சத்து 38 ஆயிரம் பயணிகள் இந்தியாவுக்குப் பயணம் செய்துள்ளதாகவும் பெட்ரோலியம் மற்றும் இயற்கை எரிவாயு அமைச்சகம் தெரிவித்துள்ளது. ஈரானில் உள்ள இந்தியத் தூதரகம், இதுவரை 2 ஆயிரத்து 300 இந்தியக் குடிமக்கள் ஈரானிலிருந்து ஆர்மீனியா மற்றும் அஜர்பைஜான் வழியாக இந்தியாவுக்குத் திரும்பும் பயணத்திற்குத் தேவையான ஏற்பாடுகளைச் செய்து கொடுத்துள்ளதாக அந்த அமைச்சகம் குறிப்பிட்டது.