மேற்கு ஆசியாவில் நிலவி வரும் பதற்றமான சூழலின்போது, இந்தியா கையாண்ட அணுகுமுறை, உறவுகளை வளர்ப்பது, உறுதியான நடவடிக்கைகளை மேற்கொள்வது மற்றும் நெருக்கடிகளைத் திறம்படக் கையாள்வது ஆகியவற்றில் இந்தியாவின் வலிமையை எடுத்துக்காட்டுவதாகப் பிரதமர் நரேந்திர மோடி தெரிவித்துள்ளார்.
புது தில்லியில் ஒரு தனியார் ஊடகக் குழு ஏற்பாடு செய்திருந்த மாநாட்டில் உரையாற்றிய பிரதமர் மோடி, பிப்ரவரி 28-க்குப் பிறகு உலக அளவில் நிலவிய நிச்சயமற்ற சூழல் இருந்தபோதிலும், இந்தியா தொடர்ந்து நம்பிக்கையுடனும், வளர்ச்சிக்கான உறுதியான அர்ப்பணிப்புடனும் முன்னேறி வருவதாகக் குறிப்பிட்டார். சவால்களைக் கண்டு நாடு இனி பின்வாங்குவதில்லை என்றும், அவற்றை நேருக்கு நேர் நின்று எதிர்கொள்வதாகவும் பிரதமர் மோடி வலியுறுத்தினார். கடினமான மற்றும் போர் போன்ற சூழல்களில்கூட, இந்தியாவின் கொள்கைகள், வியூக ரீதியான சிந்தனை மற்றும் திறன்களை உலகம் அங்கீகரித்து வருவதாகப் பிரதமர் கூறினார்.
வளைகுடா நாடுகள் முதல் மேற்கத்திய நாடுகள், தெற்கத்திய நாடுகள் மற்றும் அண்டை நாடுகள் எனப் பல்வேறு பிராந்தியங்களிலும், இந்தியா ஒரு நம்பிக்கைக்குரிய கூட்டாளியாக உருவெடுத்துள்ளதாகப் பிரதமர் மோடி மேலும் தெரிவித்தார்.
குடிமக்களுக்கான சிரமங்களைக் குறைக்கும் வகையில், எரிசக்தி, உரங்கள் மற்றும் அத்தியாவசியப் பொருட்களின் தடையற்ற இருப்பை உறுதிசெய்யும் அனைத்துத் தேவையான நடவடிக்கைகளையும் அரசு எடுத்து வருவதாகப் பிரதமர் உறுதியளித்தார். குடிமக்களின் பங்கைச் சுட்டிக்காட்டிய பிரதமர், நெருக்கடியான காலங்களிலும்கூட, 140 கோடி மக்களின் கூட்டு முயற்சிகளே நாட்டை முன்னோக்கி நகர்த்திச் செல்வதாகவும், இதன் விளைவாகப் பொருளாதாரம் தொடர்ந்து அதிவேகத்தில் வளர்ந்து வருவதாகவும் கூறினார்.