கடந்த காலத்தில் கார்கில் போரைத் தூண்டிய பாகிஸ்தான் ராணுவ தளபதி பர்வேஸ் முஷாரப்பின் நடைமுறை, இப்போது மீண்டும் பாகிஸ்தானில் திரும்ப வந்துள்ளதா என்ற கேள்வி எழுந்துள்ளது.
1999ம் ஆண்டு, இந்தியாவுக்கு எதிராக கார்கில் போரைத் தூண்டிய பர்வேஸ் முஷாரப், பின்னர் தன் அரசியல் எதிரியைப் பதவியில் இருந்து கீழே தள்ளி, நவாஸ் ஷெரீப்பின் ஆட்சியை முடிவுக்குக் கொண்டுவந்தார். இந்தியா மீது போர்கொடி தூக்கி, உள்ளூர் மக்களிடையே தேசிய உணர்வை தூண்டி, தன் ஆட்சிக்கே தளம் பதித்தார். போர் வெற்றி பெறவில்லை என்றாலும், பாகிஸ்தானுக்குள் அரசியல் மாற்றத்தை ஏற்படுத்த அவரால் முடிந்தது.
இன்று, அந்த வரலாறு புதிய வடிவத்தில் மீண்டும் உருவெடுக்கப்படுவதாக சூழ்நிலை உருவாகியுள்ளது. தற்போது பாகிஸ்தான் ராணுவ தளபதியாக இருப்பவர் சையது அசிம் முனீர். அவர் இந்தியாவை எதிரியாகக் காட்டி, பாகிஸ்தான் மக்களிடம் தேசிய உணர்வை தூண்டி, ஷாபாஸ் ஷெரீப்பின் அரசை பதற வைக்க முயற்சி செய்கிறார் என்பதே பலரது கருதுகோள். பாகிஸ்தானின் தற்போதைய அரசியல் சூழல் மிகுந்த பதற்றத்தைக் கொண்டுள்ளது. நாடு முழுவதும் நம்பிக்கையற்ற நிலை உருவாகி உள்ளது. இதனால் இன்னும் சில மாதங்களில் பாகிஸ்தானில் ஒரு புதிய ராணுவ ஆட்சி தோன்றும் என்ற கூச்சல் அதிகரித்து வருகிறது.
இந்தியாவுடன் பாகிஸ்தான் இடையே நிலவும் பதற்றம் நாளுக்கு நாள் தீவிரமாவதால், ராணுவத் தலைமையில் பெரும் கவலை நிலவுகிறது. ஜெனரல் அசிம் முனீர் தற்போதைய சூழலில் பொதுவெளியில் தோன்றாதது சந்தேகங்களை உருவாக்கியுள்ளது. அவர் தற்போது வெளிநாட்டில் இருக்கலாம் அல்லது பாதுகாப்புக்காக ‘பங்கர்’ எனப்படும் பாதுகாப்புக் குழிகளில் மறைந்திருக்கலாம் என தகவல்கள் தெரிவிக்கின்றன.
மேலும், அவர் தனது குடும்பத்தினரை பிரிட்டனுக்கு அனுப்பி வைத்திருப்பதோடு, பல ராணுவ உயர் அதிகாரிகளும் தங்கள் குடும்பங்களை பிரிட்டன் மற்றும் அமெரிக்காவின் நியூ ஜெர்சிக்கு அனுப்பிவைத்துள்ளார்கள் என்ற தகவல்கள் சமூக ஊடகங்களில் பரவி வருகின்றன.
இந்த நிலையில், பாகிஸ்தான் பிரதமர் அலுவலகம் அதிகாரப்பூர்வமாக ‘எக்ஸ்’ (முந்தைய ட்விட்டர்) தளத்தில் ஒரு புகைப்படத்தை வெளியிட்டு, அசிம் முனீர் அபோதாபாத்தில் நடந்த ராணுவ பயிற்சி விழாவில் பிரதமர் ஷாபாஸ் ஷெரீப்புடன் பங்கேற்றதாக தெரிவித்துள்ளது. புதிய வீரர்களுடன் எடுத்துக் கொண்ட குழுப்புகைப்படத்தையும் வெளியிட்டுள்ளது. புகைப்படம் எடுக்கப்பட்ட தேதியையும் குறிப்பிடப்பட்டுள்ளது. இருப்பினும், உண்மையில் அந்த புகைப்படம் அந்த தேதியில் எடுக்கப்பட்டதா என்பது குறித்து பல்வேறு சந்தேகங்கள் எழுந்துள்ளன. இது மேலும் பாகிஸ்தானின் உள்நாட்டு நிலை குறித்து நம்பிக்கையற்ற சூழலை உருவாக்கியுள்ளது.
மொத்தத்தில், பாகிஸ்தானில் தற்போது ‘போர் ஜுரம்’ வேகமாக பரவி வருகிறது. பொதுமக்கள் மட்டுமல்ல, ராணுவத்தினரும் எதிர்காலம் குறித்த அச்சத்துடன் நடுங்கிக் கொண்டிருக்கிறார்கள். நிலைமை இன்னும் எங்கு போகும் என்பது பார்வையிட வேண்டிய விடயமாக இருக்கிறது.