இந்து சமய அறநிலையத்துறை அமைச்சர் ரமேஷின் உத்தரவின் பேரில், சமயபுரம் கோவில் அலுவலர் மற்றும் வடபழனி கோவிலின் இளநிலை உதவியாளர் ஆகியோர் பணியிடை நீக்கம் (சஸ்பெண்ட்) செய்யப்பட்டுள்ளனர்.
அமைச்சராக பொறுப்பேற்றதிலிருந்து, தமிழ்நாட்டில் உள்ள பல்வேறு கோவில்களுக்கு நேரில் சென்று ஆய்வு மேற்கொண்டு வரும் ரமேஷ், கோவில் நிர்வாகத்தில் வெளிப்படைத்தன்மை மற்றும் ஒழுங்கை வலுப்படுத்த பல்வேறு நடவடிக்கைகளை மேற்கொண்டு வருகிறார்.
இந்த நிலையில், வடபழனி கோவிலின் இளநிலை உதவியாளர் நிர்வாக விதிமீறல்களில் ஈடுபட்டதாகவும், சமயபுரம் கோவில் அலுவலர் வருமானத்திற்கு அதிகமாக சொத்துகளை குவித்ததாகவும் புகார்கள் எழுந்தன.
இந்த புகார்களைத் தொடர்ந்து, அமைச்சர் ரமேஷின் உத்தரவின் அடிப்படையில் இருவரும் பணியிடை நீக்கம் செய்யப்பட்டுள்ளனர். கோவில்களில் நடைபெறும் முறைகேடுகளைத் தடுப்பதுடன், பக்தர்களுக்கு தேவையான அடிப்படை வசதிகளை மேம்படுத்தவும், நிர்வாகத்தில் சீர்திருத்தங்களை கொண்டு வரவும் இந்த நடவடிக்கைகள் தொடர்ந்து மேற்கொள்ளப்பட்டு வருவதாகத் தெரிவிக்கப்பட்டுள்ளது.