ஒழுங்கமைக்கப்பட்ட சைபர் குற்றங்களுக்கு மிகப்பெரிய அடியாக, தமிழ்நாடு சைபர் குற்றப் பிரிவு (CCW) ஜூன் 2 முதல் ஜூன் 4, 2025 அதிகாலை வரை நடத்தப்பட்ட ‘திரைநீக்கு-II’ என்ற சிறப்பு நடவடிக்கையில் மாநிலம் முழுவதும் இருந்து 136 சைபர் குற்றவாளிகளைக் கைது செய்தனர்.
டிசம்பர் 2024 ‘திரைநீக்கு-I’ நடவடிக்கையில் 76 நபர்கள் சிக்கியதைத் தொடர்ந்து, டிஜிட்டல் குற்றங்களுக்கு எதிரான மாநிலத்தின் நடவடிக்கைகளில் “ஆபரேஷன் திரைநீக்கு (முகமூடி அவிழ்ப்பு)-II” முக்கியமானதாகும். தமிழ்நாடு முழுவதும் பதிவு செய்யப்பட்ட 159 தனித்துவமான சைபர் கிரைம் வழக்குகளுடன் தொடர்புடையவர்கள் தான் இந்த கைது செய்யப்பட்ட 136 குற்றவாளிகள். இந்த நடவடிக்கையில், ஆறு முக்கியமான வங்கி முகவர்களை அடையாளம் கண்டு பிடித்துள்ளனர் சைபர் கிரிம் புலனாய்வுப் பிரிவினர். சட்டவிரோத நிதி மோசடி செய்வதில் இந்த நபர்கள் முக்கிய பங்கு வகித்ததாக அதிகாரிகள் தெரிவித்தனர்.
இந்த நடவடிக்கையில் இயங்கி வந்த 30க்கும் மேற்பட்ட போலி நிறுவனங்களையும், 100க்கும் மேற்பட்ட முகவர்களின் வலையமைப்பை நிர்வகிப்பதற்கும் ஒரு பெரிய கும்பலையும் ஒழித்துள்ளது.
“நாட்டில் இதுவரை மேற்கொள்ளப்பட்ட சைபர் குற்றவாளிகளுக்கு எதிரான மிகப்பெரிய நடவடிக்கை இதுவாகும்” என்று சைபர் கிரைம் பிரிவின் கூடுதல் காவல்துறை இயக்குநர் ஜெனரல் சந்தீப் மிட்டல் குறிப்பிட்டார்.
125 மொபைல் போன்கள், 304 வங்கிக் கணக்குகள் (முடக்கப்பட்டவை), 88 காசோலை புத்தகங்கள், 107 ஏடிஎம் டெபிட்/கிரெடிட் கார்டுகள் மற்றும் 35 டெஸ்க்டாப் கணினிகள் உள்ளிட்ட கணிசமான ஆதாரங்களை அதிகாரிகள் பறிமுதல் செய்தனர்.
இந்த கைதுகள் மாநிலத்திற்குள் ஒழுங்கமைக்கப்பட்ட சைபர் குற்றங்களை ஒழிப்பதில் ஒரு முக்கியமான படியாகும். விசாரணைகள் இன்னும் முடிவடையவில்லை, மேலும் தமிழ்நாடு காவல்துறை இப்போது ஏராளமான கைப்பற்றப்பட்ட டிஜிட்டல் ஆதாரங்களை பகுப்பாய்வு செய்து வருகிறது, மேலும் இந்தியா முழுவதும் பரவக்கூடிய குற்ற நடவடிக்கைகளின் ஆழமான அடுக்குகளைக் கண்டறிய கைது செய்யப்பட்ட நபர்களையும் விசாரித்து வருகிறது என்று அதிகாரி மேலும் கூறினார். மோசடி செய்யப்பட்ட நிதியை மீட்டெடுப்பதில் கவனம் செலுத்துவதோடு, மற்ற நெட்வொர்க் உறுப்பினர்களைக் கண்டுபிடித்து கைது செய்யவும் சைபர் போலீசார் தீவிரமாக செயல்பட்டு வருகின்றனர்.
பொதுமக்கள் விழிப்புணர்வின் முக்கியத்துவத்தை எடுத்துரைத்து, சைபர் குற்றப்பிரிவு, குடிமக்கள் தங்கள் சைபர் பாதுகாப்பை மேம்படுத்துவதற்கான வழிகாட்டுதல்களுடன் புதிய ஆலோசனைகளையும் வெளியிட்டுள்ளது. இந்த ஆலோசனைகள் தமிழ்நாடு காவல்துறை மற்றும் சைபர் குற்றப்பிரிவு வலைத்தளங்கள் மற்றும் சமூக ஊடக சேனல்களில் கிடைக்கின்றன. பொதுமக்கள் எச்சரிக்கையாக இருக்கவும், சந்தேகத்திற்கிடமான சைபர் செயல்பாடுகள் குறித்து உடனடியாகப் புகாரளிக்கவும் அதிகாரிகள் வலியுறுத்தியுள்ளனர்.