சத்தீஸ்கர் மாநிலம் சிங்கந்தேரையில் நிகழ்ந்த கொதிகலன் வெடிப்புச் சம்பவத்தில் உயிரிழந்தவர்களின் எண்ணிக்கை 14-ஆக உயர்ந்துள்ளது. சக்தி மாவட்டத்தில் உள்ள சிங்கந்தேரை கிராமத்தில் அமைந்துள்ள வேதாந்தா நிறுவனத்தின் மின் நிலையமொன்றில், நேற்று ஒரு கொதிகலன் குழாய் வெடித்தபோது இந்தச் சம்பவம் நிகழ்ந்தது.
கொதிகலனிலிருந்து விசையாழிக்கு (turbine) உயர் அழுத்த நீராவியைச் செலுத்தும் குழாய் ஒன்று, நேற்று பிற்பகல் சுமார் 2:30 மணியளவில் பயங்கரமாக வெடித்ததாகவும், இதனால் அங்குப் பணியில் ஈடுபட்டிருந்த தொழிலாளர்கள் பலத்த தீக்காயங்களுக்கு ஆளானதாகவும் சக்தி மாவட்டக் காவல் கண்காணிப்பாளர் தெரிவித்தார். இச்சம்பவத்தில் நான்கு தொழிலாளர்கள் சம்பவ இடத்திலேயே உயிரிழந்ததாகவும், சுமார் 40 பேர் காயமடைந்து அண்டை மாவட்டங்களான ராய்கர் மற்றும் பிலாஸ்பூரில் உள்ள பல்வேறு மருத்துவமனைகளுக்கு அவசரமாகக் கொண்டு செல்லப்பட்டதாகவும் அவர் கூறினார். காயமடைந்தவர்களில் குறைந்தது 15 பேரின் நிலைமை கவலைக்கிடமாக இருப்பதாகத் தெரிவிக்கப்பட்டுள்ளது.
இந்த விபத்தில் ஏற்பட்ட உயிரிழப்புகள் குறித்துப் பிரதமர் நரேந்திர மோடி ஆழ்ந்த இரங்கல் தெரிவித்துள்ளார். பிரதமரின் தேசிய நிவாரண நிதியிலிருந்து, உயிரிழந்த ஒவ்வொருவரின் குடும்பத்தினருக்கும் தலா இரண்டு லட்சம் ரூபாயும், காயமடைந்தவர்களுக்கு ஐம்பதாயிரம் ரூபாயும் கருணைத் தொகையாக வழங்கப்படும் என்று அவர் அறிவித்தார். மேலும், காயமடைந்தவர்கள் விரைவில் குணமடைய வேண்டும் என்றும் அவர் பிரார்த்தித்தார்.
இச்சம்பவம் குறித்து முதலமைச்சர் விஷ்ணு தியோ சாய் இரங்கல் தெரிவித்ததுடன், உயிரிழந்த ஒவ்வொரு தொழிலாளியின் குடும்பத்தினருக்கும் தலா 5 லட்சம் ரூபாயும், காயமடைந்தவர்களுக்கு 50,000 ரூபாயும் இழப்பீடாக வழங்கப்படும் என்று அறிவித்தார். மேலும், இந்தத் துயரச் சம்பவம் குறித்து விசாரணை நடத்துமாறு பிலாஸ்பூர் கோட்ட ஆணையருக்கு அவர் உத்தரவிட்டார். இந்த விபத்து குறித்துத் தனியாக ஒரு நீதித்துறை விசாரணை நடத்த மாவட்ட நிர்வாகம் உத்தரவிட்டுள்ளது. காயமடைந்தவர்களுக்கு முறையான சிகிச்சை கிடைப்பதை உறுதி செய்யவும், பாதுகாப்புத் தரநிலைகளை மறுஆய்வு செய்யவும் நிர்வாகத்திற்கு அறிவுறுத்தப்பட்டுள்ளது.