ரவீந்திரநாத் தாகூரின் 165-வது பிறந்தநாளைக் குறிக்கும் வகையில், ‘போச்சிஷே பைஷாக்’ (Pochishe Boishakh) தினமான இன்று ரவீந்திர ஜெயந்தி கொண்டாடப்படுகிறது. சாந்திநிகேதன், விஸ்வபாரதி பல்கலைக்கழகம் மற்றும் மேற்கு வங்கம், வங்கதேசம் முழுவதும் முக்கிய கொண்டாட்டங்களுடன், உலகெங்கிலும் கலாச்சார நிகழ்ச்சிகள் நடைபெற்று வருகின்றன. இந்நிகழ்ச்சிகளில் ரவீந்திர சங்கீதம், கவிதை, நடனம் மற்றும் நாடகம் ஆகியவை இடம்பெறுகின்றன.
‘போச்சிஷே பைஷாக்’ தினத்தை முன்னிட்டு, துணை குடியரசுத் தலைவர் சி.பி. ராதாகிருஷ்ணன் மற்றும் பிரதமர் நரேந்திர மோடி ஆகியோர் குருதேவ் ரவீந்திரநாத் தாகூருக்குத் தங்கள் அஞ்சலியைச் செலுத்தியுள்ளனர். சமூக ஊடகப் பதிவு ஒன்றில், குருதேவின் பங்களிப்புகள் இலக்கியத் துறைக்கு அப்பாற்பட்டும் பரந்து விரிந்திருந்ததாகத் துணை குடியரசுத் தலைவர் குறிப்பிட்டுள்ளார். தாகூரை ஒரு முன்னோடிச் சிந்தனையாளராகவும், கலைஞராகவும், கல்வியாளராகவும் அவர் வர்ணித்தார்; தாகூரின் படைப்புகள் இந்திய நாகரிகத்தின் செழுமையையும், மனிதகுலத்தின் உலகளாவிய விழுமியங்களையும் பிரதிபலிப்பதாக அவர் கூறினார்.
ரவீந்திரநாத் தாகூர் ஒரு அசாதாரணமான மேதமை கொண்ட எழுத்தாளர், சிந்தனையாளர் மற்றும் கவிஞர் என்று பிரதமர் குறிப்பிட்டார். ஒரு தலைசிறந்த தத்துவஞானியாகவும், கல்வியாளராகவும், கலைஞராகவும், இந்தியாவின் நாகரிக ஆன்மாவின் காலத்தால் அழியாத குரலாகவும் அவர் முத்திரை பதித்ததாக திரு. மோடி கூறினார். மனிதகுலத்தின் ஆழமான உணர்வுகளுக்கும், கலாச்சாரத்தின் உன்னதமான இலட்சியங்களுக்கும் குருதேவ் தாகூர் வடிவம் கொடுத்ததாகப் பிரதமர் தெரிவித்தார். தாகூர் புதிய சிந்தனைகள், ஆக்கப்பூர்வமான ஆற்றல் மற்றும் கலாச்சார நம்பிக்கை ஆகியவற்றைக் கொண்டு சமூகத்தைச் செழுமைப்படுத்தியதாக திரு. மோடி கூறினார். தாகூர் ஆழ்ந்த மரியாதையுடனும் நன்றியுடனும் நினைவுகூரப்படுவதாக அவர் தெரிவித்தார். தாகூரின் சிந்தனைகள் தொடர்ந்து மக்களின் மனங்களை ஒளிரச் செய்யவும், குடிமக்களின் முயற்சிகளுக்கு வழிகாட்டவும் உதவும் என்று திரு. மோடி நம்பிக்கை தெரிவித்தார்.
பாதுகாப்புத் துறை அமைச்சர் ராஜ்நாத் சிங் தனது செய்தியில், ‘ஏக் பாரத், ஷ்ரேஷ்ட பாரத்’ (ஒரே பாரதம், உன்னத பாரதம்) என்ற உணர்வை குருதேவ் ரவீந்திரநாத் தாகூர் பெரிதும் வலுப்படுத்தியதாகக் கூறினார். ரவீந்திரநாத் தாகூரை ஒரு உயர்ந்த இலக்கிய ஆளுமையாகவும், ஆழ்ந்த சிந்தனையாளராகவும், இசை மேதையாகவும் வர்ணித்த பாதுகாப்புத் துறை அமைச்சர், குருதேவ் ரவீந்திரநாத் தாகூரின் வாழ்க்கை, தத்துவம் மற்றும் விழுமியங்கள் வரும் தலைமுறையினருக்கும் தொடர்ந்து ஊக்கமளிக்கும் என்று கூறினார்.
இலக்கியம், இசை மற்றும் தத்துவம் ஆகியவற்றின் வாயிலாகச் சுதந்திர உணர்வுக்கு குருதேவ் ஒரு புதிய உத்வேகத்தை அளித்தார் என்று மத்திய உள்துறை அமைச்சர் திரு. ஷா கூறினார். ரவீந்திரநாத் தாகூரின் காலத்தால் அழியாத படைப்பான ‘கீதாஞ்சலி’, மனிதநேயம், ஆன்மீகம் மற்றும் உணர்திறன் ஆகியவற்றிற்கு ஒரு புதிய திசையை வழங்கியதாகவும்; ‘ஜன கண மன’ பாடல் தேசிய ஒற்றுமை, கண்ணியம் மற்றும் சுயமரியாதை ஆகியவற்றிற்குக் குரல் கொடுத்ததாகவும் அவர் தெரிவித்தார்.