அடுத்த தலைமுறை 6G நெட்வொர்க்குகளின் (வலைப்பின்னல்களின்) வளர்ச்சியை வடிவமைப்பதை நோக்கமாகக் கொண்ட ஒரு சர்வதேச முன்னெடுப்பில், அமெரிக்கா மற்றும் பிற 24 நாடுகளுடன் இந்தியாவும் இணைந்துள்ளது.
அடுத்த தலைமுறை நெட்வொர்க்குகள் பகிரப்பட்ட பாதுகாப்பு நலன்களைப் பிரதிபலிப்பதையும், போட்டித்தன்மையை வலுப்படுத்துவதையும், மற்றும் புதுமைகளை ஊக்குவிப்பதையும் உறுதி செய்வதற்கான முயற்சியில் இந்தியாவும் அமெரிக்கா மற்றும் பிற 24 நாடுகளுடன் இணைந்துள்ளதாக அமெரிக்க வர்த்தகத் துறை தனது சமூக ஊடகப் பதிவு ஒன்றில் தெரிவித்துள்ளது.
G20 புத்தாக்க அமைச்சர்கள் கூட்டத்தின் (G20 Innovation Ministerial) ஒரு பகுதியாக, மத்திய வர்த்தகம் மற்றும் தொழில்துறை இணையமைச்சர் ஜிதின் பிரசாதா அமெரிக்க வர்த்தகச் செயலாளர் ஹோவர்ட் லுட்னிக்கைச் சந்தித்ததைத் தொடர்ந்து இந்த அறிவிப்பு வெளியானது. 6G தொழில்நுட்பத்தின் எதிர்காலம் மற்றும் அடுத்த தலைமுறை தொலைத்தொடர்பு நெட்வொர்க்குகளை உருவாக்குவதில் சர்வதேச ஒத்துழைப்பின் முக்கியத்துவம் குறித்து இவ்விரு தலைவர்களும் விவாதித்தனர்.
இச்சந்திப்பின் போது, குறைக்கடத்திகள் (semiconductors), செயற்கை நுண்ணறிவு (AI) மற்றும் தரவு மையங்கள் (data centres) ஆகியவற்றில் ஒத்துழைப்பை வலுப்படுத்துவது குறித்து இந்தியாவும் அமெரிக்காவும் விவாதித்தன. ‘ISM 2.0’ திட்டத்தில் அதிக அமெரிக்க முதலீடுகளை ஈர்ப்பதற்கான வாய்ப்புகளை அமைச்சர் பிரசாதா ஊக்குவித்ததுடன், AI தொழில்நுட்பக் கூட்டாண்மையை வலுப்படுத்துவது குறித்தும், AI-க்கான பாதுகாப்பு வழிமுறைகள் குறித்தும் கருத்துகளைப் பகிர்ந்துகொண்டார். அமெரிக்க வர்த்தகத் துறை மற்றும் வெள்ளை மாளிகையின் அறிவியல் மற்றும் தொழில்நுட்பக் கொள்கை அலுவலகம் (OSTP) ஆகியவற்றால் நடத்தப்பட்ட G20 புத்தாக்க அமைச்சர்கள் கூட்டத்தில் (செப்டம்பர் 1 மற்றும் 2 தேதிகளில் அமெரிக்காவின் வட கரோலினாவில் உள்ள சேப்பல் ஹில்லில் நடைபெற்றது) இந்தியக் குழுவிற்கு ஜிதின் பிரசாதா தலைமை தாங்கினார்.
வளம், உற்பத்தித்திறன் மற்றும் வாய்ப்புகளை மேம்படுத்துவதில் வளர்ந்து வரும் தொழில்நுட்பங்களின் ஆற்றலை முன்னிலைப்படுத்தும் ‘G20 புத்தாக்க அமைச்சர்கள் கூட்ட அறிக்கை’யுடன் இக்கூட்டம் நிறைவடைந்தது. செயற்கை நுண்ணறிவு (AI), குறைக்கடத்திகள், டிஜிட்டல் பொது உள்கட்டமைப்பு (DPI), ரோபோட்டிக்ஸ் மற்றும் பிற வளர்ந்து வரும் தொழில்நுட்பங்களில் மூலோபாயக் கூட்டாண்மைகளை உருவாக்குவதன் மூலம், புதுமை, பொருளாதார வளர்ச்சி மற்றும் குடிமக்களின் மேம்பட்ட வாழ்க்கைத்தரம் ஆகியவற்றுக்கான வாய்ப்புகளை உருவாக்குவதில் தனது உறுதிப்பாட்டை இந்தியா மீண்டும் வலியுறுத்தியது.