ஆக்கிரமிக்கப்பட்ட மேற்குக்கரையில் உள்ள பாலஸ்தீன கிராமங்கள் மீது இஸ்ரேலியக் குடியேறிகள் நடத்தும் தாக்குதல்கள் அதிகரித்துள்ளதாகக் கூறப்படும் நிலையில், அங்குள்ள இஸ்ரேலியக் குடியேற்றங்களுடனான வர்த்தகத்தின் மீது தடைகளை விதிக்கப்போவதாக பிரிட்டன், கனடா மற்றும் பிரான்ஸ் உள்ளிட்ட 12 நாடுகள் அறிவித்தன. டென்மார்க், பின்லாந்து, ஐஸ்லாந்து, அயர்லாந்து, நார்வே, போலந்து, போர்ச்சுகல், ஸ்பெயின் மற்றும் ஸ்வீடன் ஆகிய நாடுகளின் வெளியுறவு அமைச்சர்களும் இக்குடியேற்றங்களுடனான வர்த்தகத்தைக் கட்டுப்படுத்தத் திட்டமிட்டுள்ளனர்.
இஸ்ரேல் மற்றும் பாலஸ்தீனம் ஆகிய இரு நாடுகளும் அமைதியாக அருகருகே வாழ்வதை நோக்கமாகக் கொண்ட ‘இரு-நாட்டுத் தீர்வு’ (two-state solution) திட்டத்தின் சாத்தியக்கூறுகளை, மேற்குக்கரையில் இஸ்ரேல் அரசாங்கம் மேற்கொள்ளும் நடவடிக்கைகள் சீர்குலைப்பதாக 12 நாடுகளின் வெளியுறவு அமைச்சர்கள் கூட்டறிக்கை ஒன்றில் தெரிவித்தனர்.
சர்வதேச சட்டத்தின்படி சட்டவிரோதமானதாகக் கருதப்படும் குடியேற்றங்களிலிருந்து வரும் பொருட்களுக்குத் தேசிய அளவிலான மற்றும் ஐரோப்பிய அளவிலான வர்த்தகக் கட்டுப்பாடுகளை விதிக்கத் திட்டமிட்டுள்ளதாக அமைச்சர்கள் கூறினர். மேலும், சில நாடுகள் தங்கள் தேசிய சட்டங்கள் மற்றும் நடைமுறைகளுக்கு ஏற்ப பிற நடவடிக்கைகளையும் பரிசீலித்து வருவதாக அவர்கள் தெரிவித்தனர்.
பிரிட்டனின் வெளியுறவு அமைச்சர் எட் மிலிபண்ட் இன்று நாடாளுமன்றத்தில் பேசுகையில், மேற்குக்கரையில் குடியேறிகள் மேற்கொள்ளும் ‘இனச் சுத்திகரிப்பு’ (ethnic cleansing) நடவடிக்கைகளை இஸ்ரேல் அரசாங்கம் கண்டுகொள்ளாமல் இருப்பதாகக் குற்றம் சாட்டினார். பிற நாடுகளுடன் ஒருங்கிணைந்து மேற்கொள்ளப்படும் நடவடிக்கையின் ஒரு பகுதியாக, ஆக்கிரமிக்கப்பட்ட பகுதிகளில் உள்ள சட்டவிரோதக் குடியேற்றங்களிலிருந்து வரும் பொருட்களுக்கு இறக்குமதித் தடையை இங்கிலாந்து அரசாங்கம் அறிமுகப்படுத்தும் என்றும் அவர் கூறினார்.