ஜனவரியில் அமெரிக்கப் படைகளால் பிடிக்கப்பட்டு அமெரிக்காவில் சிறையில் அடைக்கப்பட்டுள்ள வெனிசுலா அதிபர் நிக்கோலஸ் மதுரோ மீதான போதைப்பொருள் பயங்கரவாதக் குற்றச்சாட்டை, தற்போதைக்கு தள்ளுபடி செய்ய அமெரிக்க கூட்டாட்சி நீதிமன்ற நீதிபதி ஒருவர் மறுத்துவிட்டார்.
மதுரோ மற்றும் அவரது மனைவி சிலியா ஃப்ளோரஸ் ஆகியோருக்கான சட்டக் கட்டணங்களைச் செலுத்துவதிலிருந்து அமெரிக்கத் தடைகள் வெனிசுலா அரசாங்கத்தைத் தடுக்கின்றன என்ற அடிப்படையில், இந்த வழக்கை தள்ளுபடி செய்ய மதுரோவின் தரப்பு வழக்கறிஞர்கள் கோரியிருந்தனர். மதுரோவின் பதவி நீக்கத்தைத் தொடர்ந்து உறவுகள் மேம்பட்டு வரும் நிலையில், இந்தச் செலவுகளை காரகாஸ் ஏற்பதைத் தொடர்ந்து தடைசெய்யும் டிரம்ப் நிர்வாகத்தின் முடிவைக் கேள்விக்குட்படுத்திய மூத்த நீதிபதி ஆல்வின் ஹெலர்ஸ்டீன், தற்போதைக்கு இந்த வழக்கை தள்ளுபடி செய்யப் போவதில்லை என்று கூறினார்.
இந்தத் தம்பதியினர் ஒரு அரசு வழக்கறிஞரைப் பயன்படுத்திக்கொள்ளலாம் என்று கூறி, தொடரும் இந்தத் தடையை அரசுத் தரப்பு வழக்கறிஞர்கள் நியாயப்படுத்த முயன்றனர், ஆனால் ஹெலர்ஸ்டீன் அந்த வாதத்தில் சந்தேகத்துடன் காணப்பட்டார்.
மதுரோ வழக்கறிஞருக்குப் பணம் செலுத்துவதை டிரம்ப் நிர்வாகம் தன்னிச்சையாகத் தடுக்கிறது என்று பின்னர் தெரியவந்தால், வழக்கை தள்ளுபடி செய்யாத தனது முடிவை மறுபரிசீலனை செய்யக்கூடும் என நீதிபதி குறிப்பிட்டார். மதுரோவும் புளோரஸும் நாடு கடத்தப்பட்ட பிறகு நடைபெற்ற இரண்டாவது விசாரணை இதுவாகும். வெனிசுலா தலைவரும் முதல் பெண்மணியும் இதற்கு முன்னர் ஜனவரியில் நடந்த ஆரம்பகட்ட விசாரணையின்போது தாங்கள் குற்றமற்றவர்கள் என்று வாதிட்டனர்.