“அமெரிக்காவின் பொறுமை குறைந்து வருகிறது. ஈரான் நிபந்தனையின்றி சரணடைய வேண்டும்,” என அமெரிக்க அதிபர் டொனால்ட் டிரம்ப் கடும் எச்சரிக்கை விடுத்துள்ளார். ஈரான் தொடர்பான பதற்றம் அதிகரித்துள்ள இந்நேரத்தில், அவரது இந்த வீடியோ செய்தி சமூக வலைதளங்களில் பரவலாக வைரலாகி வருகிறது.
ஈரான்-இஸ்ரேல் மோதல்: அமெரிக்காவின் நிலைப்பாடு
கடந்த சில நாட்களாக இஸ்ரேல், ஈரானின் மீது தொடர் தாக்குதல்களை நடத்தி வருகிறது. ஈரானும் இஸ்ரேல் மீது பதில் தாக்குதல் நடத்தி வருகிறது. இதற்கு அமெரிக்கா நேரடியாக பொறுப்பு ஏற்கவில்லை என்றாலும், ஈரான் அமெரிக்க தளவாடங்கள் அல்லது படைகளை தாக்கினால், கடுமையான பதிலடி கொடுக்கப்படும் என அமெரிக்க அதிகாரிகள் தெரிவித்துள்ளனர். மேலும், ஈரான் அணு ஆயுதங்களை உருவாக்க முயற்சிக்கக் கூடாது என்பதே அமெரிக்காவின் வலியுறுத்தலாக உள்ளது.
“அயதுல்லா காமெனி எங்கு மறைந்திருக்கிறார் என்று எங்களுக்குத் தெரியும்” – டிரம்ப்
இந்நிலையில், டொனால்ட் டிரம்ப் தனது சமூக வலைதளப் பக்கத்தில் ஒரு வீடியோவைப் பகிர்ந்து, ஈரானுக்கு கடும் எச்சரிக்கை விடுத்துள்ளார். அவர் குறிப்பிட்டதாவது:
“ஈரானின் உச்ச தலைவர் அயதுல்லா காமெனி எங்கு மறைந்திருக்கிறார் என்று எங்களுக்குத் தெரியும். அவர் எங்களுக்கு எளிதான இலக்கு. ஆனால், அவர் பாதுகாப்பாக இருக்கட்டும். குறைந்தபட்சம் இப்போதைக்கு அவரைக் கொல்லப் போவதில்லை. ஆனால், சாதாரண மக்களையோ, அமெரிக்க வீரர்களையோ ஏவுகணைகளால் தாக்குவதை நாங்கள் விரும்பவில்லை. எங்களது பொறுமை குறைந்து வருகிறது. . நிபந்தனையின்றி சரணடையுங்கள்.”
இந்தப் பேச்சு, ஈரானுக்கு எதிரான அமெரிக்காவின் கடுமையான நிலைப்பாட்டை மீண்டும் உறுதிப்படுத்தியுள்ளது.
ஈரானின் எதிர்வினை என்ன?
டிரம்பின் இந்த எச்சரிக்கைக்கு ஈரான் இதுவரை எந்தப் பதிலையும் வழங்கவில்லை.