ரயில்வே பயணிகள் தங்கள் முன்பதிவு செய்த டிக்கெட்டுகளின் நிலை மற்றும் ஆசன ஒதுக்கீட்டு விவரங்களை முன்கூட்டியே அறிந்துகொள்வதற்கான நடவடிக்கையாக, ரயில்வே அமைச்சகம் முக்கியமான மாற்றத்தை அறிவித்துள்ளது. இனி, ரயில் புறப்படுவதற்கு 8 மணி நேரத்திற்கு முன்பே ‘ரிசர்வேஷன் சார்ட்’ வெளியிடப்படும் என்று தெரிவிக்கப்பட்டுள்ளது.
இதுவரை, ஒரு ரயிலுக்கான முன்பதிவு அட்டவணை (Reservation Chart) ரயில் புறப்படும் 4 மணி நேரத்திற்கு முன் மட்டுமே வெளியிடப்பட்டு வந்தது. இதனால், சில பயணிகள் தங்கள் இடம் உறுதி செய்ய முடியாமல், குழப்ப நிலை ஏற்படுவதாக பல்வேறு புகார்கள் வந்துள்ளன.
இந்தப் புகார்கள் மற்றும் பயணிகள் நலனை கருத்தில் கொண்டு, ரயில்வே வாரியம், முன்பதிவு சார்ட்டை மேலும் முன்கூட்டியே வெளியிட பரிந்துரை செய்தது. இந்த பரிந்துரை, ரயில்வே அமைச்சர் அஸ்வினி வைஷ்ணவ் அவர்களின் கவனத்திற்கு கொண்டு செல்லப்பட்டபோது, அவர் அதனை ஏற்று, இன்று (ஜூலை 1) முதல் படிப்படியாக அமல்படுத்த உத்தரவு பிறப்பித்துள்ளார்.
பயணிகள் நலனுக்காக மாற்றம்
ரயில்வே அமைச்சகம் வெளியிட்டுள்ள செய்திக் குறிப்பில் கூறியிருப்பதாவது:
“பயணிகள் தங்கள் பயண திட்டங்களை திட்டமிட்ட முறையில் உறுதி செய்யும் வகையில், ரிசர்வேஷன் சார்ட் வெளியீடு நேரத்தில் மாற்றம் செய்யப்படுகிறது. இது பயண அனுபவத்தை மேலும் சிறப்பாக மாற்றும்.”
இது பயணிகள் நன்மைக்காகவே கொண்டுவரப்படும் மாற்றமாகும். குறிப்பாக, ‘வெயிட்டிங் லிஸ்ட்’, ‘கன்ஃபார்ம்ட் சீட்’, ‘RAC’ போன்ற இடமாற்றங்களை முன்கூட்டியே தெரிந்து கொள்வதற்கான வாய்ப்பு பயணிகளுக்கு கிடைக்கும்.
பயணிகள் www.irctc.co.in அல்லது மொபைல் ஆப் போன்ற இணையதளங்கள் வாயிலாக தங்கள் டிக்கெட் நிலைகளை எளிதில் பரிசீலிக்கலாம் என்றும் அறிவுறுத்தப்பட்டுள்ளது.