தமிழ்நாடு மற்றும் ஆந்திரப் பிரதேசத்தில் ரயில்வே உள்கட்டமைப்பை மேம்படுத்தும் வகையில் மொத்தம் ரூ.4,178.13 கோடி மதிப்பிலான இரண்டு முக்கிய ரயில்வே திட்டங்களுக்கு மத்திய ரயில்வே அமைச்சகம் ஒப்புதல் அளித்துள்ளது. மொத்தம் 236 கிலோமீட்டர் தொலைவுக்கு மேற்கொள்ளப்பட உள்ள இந்தத் திட்டங்களில், ஏற்கனவே உள்ள ஒரு ரயில் பாதையை இரட்டிப்பாக்கும் பணியும், மற்றொரு வழித்தடத்தில் 3-வது மற்றும் 4-வது ரயில் பாதைகள் அமைக்கும் பணியும் இடம்பெற்றுள்ளன. இந்தத் திட்டங்கள் தெற்கு ரயில்வே நிர்வாகத்தின் கீழ் செயல்படுத்தப்பட உள்ளன.
இதில் முக்கிய திட்டமாக சேலம்–கரூர்–திண்டுக்கல் இடையிலான 159 கி.மீ. நீளமுள்ள ரயில் பாதையை இரட்டிப்பாக்கும் திட்டம் ரூ.2,241.67 கோடி மதிப்பில் செயல்படுத்தப்பட உள்ளது. இந்தப் பாதை இரட்டிப்பாக்கப்படுவதன் மூலம், தற்போதைய ரயில் போக்குவரத்து நெரிசலை குறைத்து, பயணிகள் மற்றும் சரக்கு ரயில்களின் இயக்கத் திறனை அதிகரிக்க முடியும் என எதிர்பார்க்கப்படுகிறது.
சேலம், நாமக்கல், கரூர் மற்றும் திண்டுக்கல் பகுதிகளை இணைக்கும் இந்த வழித்தடம் தொழில் மற்றும் விவசாய ரீதியாகவும் முக்கியத்துவம் வாய்ந்ததாக உள்ளது. குறிப்பாக எஃகு, சிமெண்ட், ஜவுளி, விவசாயம் மற்றும் உணவு பதப்படுத்துதல் உள்ளிட்ட துறைகளின் சரக்கு போக்குவரத்துக்கு இந்த வழித்தடம் பயன்படுகிறது. ரயில் பாதை இரட்டிப்பாக்கப்பட்ட பின்னர் சரக்கு போக்குவரத்து வேகம் மற்றும் தளவாடத் திறன் மேம்படுவதுடன், இந்தப் பகுதிகளுக்கிடையேயான ரயில் இணைப்பும் வலுப்பெறும் என தெரிவிக்கப்பட்டுள்ளது.
அரக்கோணம்–ரேணிகுண்டா இடையே 3, 4-வது ரயில் பாதைகள்:
மற்றொரு முக்கிய திட்டமாக அரக்கோணம்–ரேணிகுண்டா இடையே 77 கி.மீ. தொலைவுக்கு 3-வது மற்றும் 4-வது ரயில் பாதைகள் அமைக்க ரூ.1,936.46 கோடி ஒதுக்கீட்டுக்கு ஒப்புதல் வழங்கப்பட்டுள்ளது. தமிழ்நாடு மற்றும் ஆந்திரப் பிரதேசத்தை இணைக்கும் இந்த முக்கிய வழித்தடத்தில் கூடுதல் ரயில் பாதைகள் அமைப்பதன் மூலம் ரயில் போக்குவரத்து திறன் அதிகரிக்கும். பயணிகள் ரயில்களின் இயக்கத்தை மேம்படுத்துவதுடன், அதிகரித்து வரும் சரக்கு ரயில் போக்குவரத்தையும் கையாள முடியும் என எதிர்பார்க்கப்படுகிறது.
இந்த வழித்தடம் அதிக போக்குவரத்து கொண்ட ரயில் பாதைகளில் ஒன்றாக இருப்பதால், கூடுதல் பாதைகள் அமைப்பது ரயில்களின் இயக்கத்தில் ஏற்படும் நெரிசலை குறைக்கவும், நேரத்தை மேம்படுத்தவும் உதவும் என தெரிவிக்கப்பட்டுள்ளது. மேலும், இந்த வழித்தடம் முக்கிய நெடுஞ்சாலைகள், விமான நிலையங்கள், தொழில் மையங்கள் மற்றும் பிற போக்குவரத்து முனையங்களுடன் இணைப்பைக் கொண்டுள்ளது. இதனால் பயணிகள் மட்டுமின்றி தொழில் மற்றும் வர்த்தகத்துக்கான சரக்கு போக்குவரத்துக்கும் இந்தத் திட்டங்கள் முக்கியத்துவம் பெறுகின்றன.
ரயில் போக்குவரத்து திறனை அதிகரிக்கும் திட்டங்கள்:
மொத்தம் ரூ.4,178.13 கோடி மதிப்பிலான இந்த இரு திட்டங்களும் ரயில்வே கட்டமைப்பின் திறனை அதிகரிப்பதுடன், பயணிகள் மற்றும் சரக்கு ரயில்களின் சீரான இயக்கத்துக்கு உதவும் வகையில் திட்டமிடப்பட்டுள்ளன.சேலம்–கரூர்–திண்டுக்கல் பாதை முழுமையாக இரட்டிப்பாக்கப்படுவதும், அரக்கோணம்–ரேணிகுண்டா வழித்தடத்தில் 3 மற்றும் 4-வது பாதைகள் அமைக்கப்படுவதும் தமிழ்நாடு மற்றும் ஆந்திரப் பிரதேசத்தின் ரயில் இணைப்பை மேலும் வலுப்படுத்தும் நடவடிக்கையாக பார்க்கப்படுகிறது. இந்தத் திட்டங்கள் நிறைவேற்றப்பட்ட பின்னர், தென் இந்தியாவின் முக்கிய தொழில் மற்றும் வர்த்தக மையங்களுக்கு இடையிலான பயணிகள் மற்றும் சரக்கு ரயில் போக்குவரத்து திறன் மேலும் அதிகரிக்கும் என எதிர்பார்க்கப்படுகிறது.