பிரிட்டன் ராணுவத்தில், நேபாள வீரர்களுக்கான ‘கூர்க்கா’ படைப்பிரிவை போலவே, சீக்கிய சமூகத்துக்கான தனி படைப்பிரிவு ஒன்றை உருவாக்க வேண்டும் என்ற கோரிக்கை மீண்டும் முன்னிலை பெறுகிறது. இக்கோரிக்கை தற்போது பிரிட்டன் அரசின் கவனத்திற்கும் வந்துள்ளது. முக்கியமாக, புதிய தொழிலாளர் கட்சி ஆட்சி இதை பரிசீலிக்கத் தயாராக உள்ளதாக ராணுவ அமைச்சர் உறுதிபட தெரிவித்துள்ளார்.
சீக்கியர்கள், 1840-ஆம் ஆண்டு காலத்திலிருந்தே பிரிட்டிஷ் ராணுவத்தில் சேவை புரிந்து வருகின்றனர். குறிப்பாக முதல் மற்றும் இரண்டாம் உலகப் போரில், அவர்கள் அளித்த தியாகம், வீரத்துக்கான புகழ் உலகளவில் பரவியது. ஆயிரக்கணக்கான சீக்கியர்கள் போர்க்களங்களில் பங்கேற்று, பலர் உயிர்தியாகமும் செய்துள்ளனர்.
இந்த கோரிக்கையை சமீபத்தில் பிரிட்டிஷ் பார்லிமென்டில் எழுப்பியவர் தொழிலாளர் கட்சியைச் சேர்ந்த எம்.பி. குல்தீப் சிங் சஹோட்டா. அவர் தனது உரையில் கூறியதாவது: “2015 ஆம் ஆண்டு முதலே ‘சீக்கிய படைப்பிரிவு’ கோரிக்கை எழுந்தாலும், இதுவரை எந்தவிதமான நடவடிக்கையும் எடுக்கப்படவில்லை. சீக்கிய சமூகத்தின் தியாகத்தையும், நிலைத்த நிலைப்பாட்டையும் மதித்து, தனி படைப்பிரிவை உருவாக்க வேண்டும்.” அவர் இரு உலகப் போர்களிலும் சீக்கியர்கள் காட்டிய வீரத் தன்மையும், விசுவாசமும் அரசியல்துறையில் வழிகாட்டியாக இருக்க வேண்டும் என்றும் வலியுறுத்தினார்.
இக்கோரிக்கைக்கு பதிலளித்த பிரிட்டன் ராணுவ அமைச்சர் வெர்னான் ரோட்னி கோக்கர், “சீக்கிய படைப்பிரிவை உருவாக்கும் கோரிக்கையை பரிசீலிக்க நாங்கள் தயார். பிரதமர் கெய்ர் ஸ்டாமர் தலைமையிலான புதிய தொழிலாளர் ஆட்சி, நேர்மையாக ஆராய்ந்து தீர்மானம் எடுக்கும்,” என நம்பிக்கை தெரிவித்தார்.
பிரிட்டன் ராணுவத்தில் தற்போது 160க்கும் மேற்பட்ட சீக்கியர்கள் பணி புரிந்து வருகின்றனர். அவை வெறும் ஓர் படைப்பிரிவைத் தாண்டி, பல்வேறு நிலைகளிலும், பொறுப்பான பதவிகளிலும் செயலில் உள்ளனர். “சீக்கியர்களுக்கான தனி படைப்பிரிவு அமைக்கப்பட வேண்டும்” என்ற கோரிக்கை சமூக அரசியலில் பரவலான ஆதரவைப் பெற்றுள்ள முக்கிய பிரச்னையாகவும் மாறியுள்ளது.
சமுதாய அடிப்படையில் சேவையை விரிவுபடுத்தும் நோக்கில், பிரிட்டன் ராணுவத்தில் ‘சீக்கிய படைப்பிரிவு’ அமைப்பது வரவேற்கத்தக்க முன்னேற்றமாகவே பார்க்கப்படுகிறது. எதிர்வரும் நாட்களில் இது குறித்து அரசாங்கத்திடமிருந்து அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது.