முதியோர் மற்றும் மாற்றுத் திறனாளிகள் ரேஷன் கடைகளுக்கு நேரடியாக சென்று பொருட்களை வாங்கும் சிரமத்தை தவிர்க்க, அவர்களின் வீடுகளுக்கே ரேஷன் பொருட்களை கொண்டு சேர்க்கும் முதல்வரின் தாயுமானவர் திட்டத்தை தமிழக முதல்வர் மு.க. ஸ்டாலின் இந்த மாதம் 12ஆம் தேதி தொடங்கி வைக்கிறார்.
அரசின் அதிகாரப்பூர்வ அறிவிப்பு
தமிழக அரசு வெளியிட்டுள்ள அறிக்கையில் கூறப்பட்டதாவது: மாநிலம் முழுவதும் 70 வயதுக்கு மேற்பட்ட முதியோர் மற்றும் பதிவு செய்யப்பட்ட மாற்றுத் திறனாளிகள் வசிக்கும் வீடுகளுக்கே ரேஷன் பொருட்களை கொண்டு சென்று வழங்கும் திட்டம் இம்மாதம் 12ஆம் தேதி, சென்னை நகரில் நடைபெறும் விழாவில் முதல்வர் ஸ்டாலின் அவர்களால் துவக்கப்பட உள்ளது.
யார் யார் பயன்பெறுவார்கள்?
மாநிலம் முழுவதும் உள்ள 34,809 ரேஷன் கடைகளில் பதிவு செய்யப்பட்டுள்ள 15.80 லட்சம் ரேஷன் கார்டுகளில், 70 வயதுக்கு மேற்பட்ட 20.40 லட்சம் முதியோர் பயன்பெறுவர். அதேபோல், 91,969 ரேஷன் அட்டைகளில் பதிவு செய்யப்பட்ட 1.27 லட்சம் மாற்றுத் திறனாளிகள் இதில் பயன்பெறுவர். மொத்தமாக 16.70 லட்சம் ரேஷன் அட்டைகளில் உள்ள 21.70 லட்சம் பயனாளிகளுக்கு, அவர்களின் வீடுகளுக்கே ரேஷன் பொருட்கள் வழங்கப்படும்.
திட்டம் எப்போது செயல்படும்?
ஒவ்வொரு மாதமும் இரண்டாவது சனி மற்றும் ஞாயிற்றுக்கிழமைகளில் இந்த சேவை நடைபெறும்.
பயனாளர்களின் விவரங்கள், உணவுப் பொருள் வழங்கல் துறையால் சேகரிக்கப்பட்டு, தகுந்த கள அலுவலர்களுக்கு அனுப்பப்பட்டுள்ளது.
எப்படி வழங்கப்படும்?
மின்னணு எடைதராசு மற்றும் விற்பனை முனை கருவியுடன் (Point of Sale Device) கூடிய வாகனங்களில், ரேஷன் கடை விற்பனையாளர்கள் நேரடியாக பயனாளர்களின் வீடுகளுக்குச் சென்று பொருட்களை வழங்குவார்கள்.
இந்தத் திட்டத்திற்காக மாநில அரசுக்கு ஆண்டுக்கு ₹30.1 கோடி செலவாகும் எனவும் குறிப்பிடப்பட்டுள்ளது. இந்தத் திட்டம், முதியோர் மற்றும் மாற்றுத் திறனாளிகளின் வாழ்க்கைத் தரத்தை மேம்படுத்தி, அவர்களின் அன்றாட சிரமங்களை குறைக்கும் ஒரு முக்கியமான சமூக நலப் பணியாக அரசு வலியுறுத்தியுள்ளது.