மருந்து மற்றும் மருத்துவத் தொழில்நுட்பத் துறையில் ஆராய்ச்சி மற்றும் புத்தாக்கத்தை ஊக்குவிக்கும் திட்டத்தின் (PRIP) முதல் கட்டத்தின் கீழ், 41 மருந்து மற்றும் மருத்துவத் தொழில்நுட்பப் புத்தாக்கத் திட்டங்களுக்கு ரூ.1,600 கோடி நிதி ஒதுக்கீட்டிற்கு ஒப்புதல் அளிக்கப்பட்டிருப்பதாக ரசாயனம் மற்றும் உரங்கள் அமைச்சகம் தெரிவித்துள்ளது.
இத்திட்டங்களுக்கு ஒப்புதல் அளிக்கப்பட்டதன் மூலம், கூடுதலாக ரூ.3,000 கோடிக்கும் அதிகமான தனியார் முதலீடுகள் ஈர்க்கப்படும் என்று எதிர்பார்க்கப்படுகிறது; இதன் விளைவாக, இத்திட்டங்களுக்கான மொத்த ஆராய்ச்சி மற்றும் மேம்பாட்டு முதலீடு சுமார் ரூ.4,620 கோடியாக உயரும். புதிய மருந்துகளைக் கண்டறிதல், மருத்துவப் பரிசோதனை மற்றும் மேம்பாடு (clinical development) மற்றும் புதுமையான மருத்துவத் தொழில்நுட்பங்கள் எனப் புத்தாக்கச் செயல்பாட்டுச் சங்கிலியின் பல்வேறு நிலைகளை உள்ளடக்கிய திட்டங்களுக்கு ஒப்புதல் அளிக்கப்பட்டிருப்பதாக அமைச்சகம் கூறியுள்ளது.
இதுவரை ஒப்புதல் அளிக்கப்பட்ட 41 திட்டங்களில், 12 திட்டங்கள் ஆரம்ப நிலையிலும், 29 திட்டங்கள் அடுத்தகட்ட நிலையிலும் உள்ளன. இதில் 19 திட்டங்கள் ஸ்டார்ட்-அப் (startups) மற்றும் குறு, சிறு மற்றும் நடுத்தர நிறுவனங்களாலும் (MSMEs), 22 திட்டங்கள் பெரிய நிறுவனங்களாலும் மேற்கொள்ளப்படுகின்றன. முன்னுரிமைப் பகுதிகளைப் பொறுத்தவரை, 27 திட்டங்கள் புதிய மருந்துகள் சார்ந்தும், 5 திட்டங்கள் சிக்கலான ஜெனரிக் (complex generics) மற்றும் பயோசிமிலர்கள் (biosimilars) சார்ந்தும், 9 திட்டங்கள் புதுமையான மருத்துவக் கருவிகள் சார்ந்தும் அமைந்துள்ளன.