புக்கர் பரிசை வென்று கிட்டத்தட்ட இரண்டு தசாப்தங்களாக எந்த நாவலையும் வெளியிடாத இந்திய எழுத்தாளர் கிரண் தேசாய், தனது நீண்டகாலமாக எதிர்பார்க்கப்பட்ட புதிய நாவலுக்காக மீண்டும் விருதுக்கான பட்டியலில் இடம் பெற்றுள்ளார்.
உலக இலக்கியத்தில் மிக உயரிய கௌரவமாகக் கருதப்படும் புக்கர் பரிசுக்கான முதற்கட்ட பட்டியலில் இந்திய-அமெரிக்க எழுத்தாளர் கிரண் தேசாய் எழுதிய புதிய நாவல் “The Loneliness of Sonia and Sunny” இடம் பெற்றுள்ளது.
புகழ்பெற்ற எழுத்தாளராக இருப்பவர் கிரண் தேசாய், இதுவரை மூன்று நாவல்களை எழுதியுள்ளார். இவரது இரண்டாவது நாவல், “The Inheritance of Loss”, 2006ம் ஆண்டு வெளியானதும், அந்த ஆண்டிற்கான புக்கர் பரிசை வென்று சர்வதேச கவனத்தை பெற்றது. அந்த வெற்றிக்குப் பிறகு, அவர் எழுதிய மூன்றாவது நாவல் “The Loneliness of Sonia and Sunny” தற்போது வாசகர்களை அணுக உள்ள நிலையில், அது புக்கர் பரிசுக்கான 2025ம் ஆண்டுக்கான பட்டியலில் (Longlist) சேர்க்கப்பட்டிருக்கிறது.
இந்த நாவல் செப்டம்பர் 2025ல் வெளியிடப்படவிருக்கிறது. உலகின் தலைசிறந்த 13 நாவல்களுக்கு இடையில் இது இந்த வருடத்திற்கான புக்கர் விருது பட்டியலில் தேர்வாகியுள்ளது. இந்த பட்டியலில் இடம் பெற்ற மற்ற 12 நாவல்களுடன் போட்டியிடும் இந்த நூல், விரைவில் அறிவிக்கப்படும் குறுகிய பட்டியலுக்கு (Shortlist) தேர்வாகும் வாய்ப்பும் அதிகமாக உள்ளது.
புக்கர் பரிசுக்கான கடைசி தேர்வு ஆறு நாவல்களுக்குள் நடைபெறும். இறுதியில் தேர்வு செய்யப்படும் ஒரே நாவலுக்கு 58 லட்சம் ரூபாய் பரிசுத் தொகையும், இலக்கிய உலகின் மிகப்பெரிய கௌரவமும் வழங்கப்படும்.
இந்த ஆண்டுக்கான புக்கர் பரிசு, “நவம்பர் 10ம் தேதி”, பிரிட்டனின் லண்டனில் நடைபெறும் சிறப்புவிழாவில் அறிவிக்கப்படவுள்ளது. உலகெங்கிலும் இருந்து இலக்கிய வாசகர்கள், விமர்சகர்கள், பதிப்பகத் தலைவர்கள் என பலரும் எதிர்பார்க்கும் இந்த விழா, ஆண்டுதோறும் எழுத்தாளர்களுக்கான உயரிய அங்கீகாரமாக அமைந்து வருகிறது.
2006ம் ஆண்டு புக்கர் பரிசை வென்ற பிறகு, 19 ஆண்டுகள் இடைவெளிக்கு பிறகு, கிரண் தேசாய் இப்போது அவரது புதிய படைப்புடன் வருவது இலக்கிய உலகத்தில் பெரும் எதிர்பார்ப்பை உருவாக்கியுள்ளது. இந்திய நாவலின் தனித்துவமான குரலையும், நவீன உலகின் உளவியலும் பேசும் இந்த நாவல், புக்கர் பரிசு வெல்வதற்கான ஆற்றல் கொண்டதாகக் கருதப்படுகிறது.
இதன் மூலம், இந்திய எழுத்தாளர்களின் படைப்புகள் சர்வதேச இலக்கிய மேடைகளில் தொடர்ந்து வலியுறுத்தப்படுவது இந்திய எழுத்தாளர்களுக்கு ஒரு ஊக்கமளிக்கக் கூடிய நிகழ்வாகும்.