எல்லை தாண்டிய ரயில் வழி சரக்கு போக்குவரத்தில் ஒரு புதிய அத்தியாயத்தை உருவாக்கும் வகையில், இந்தியாவின் முதல் நேரடி வணிக கன்டெய்னர் சரக்கு ரயில் நேபாளத்தை அடைந்துள்ளது.
திருத்தப்பட்ட இந்தியா-நேபாள ரயில் போக்குவரத்து நெறிமுறையின் கீழ், கனோலா சரக்கை ஏற்றிச் சென்ற 40 வேகன்களைக் கொண்ட இந்த ரயில் தனது பயணத்தை நிறைவு செய்ததாக ரயில்வே அமைச்சகம் தெரிவித்துள்ளது. இந்த வெற்றிகரமான செயல்பாட்டின் மூலம், கொல்கத்தா துறைமுகத்திலிருந்து விராட்நகருக்கு எல்லைப் பகுதியில் சரக்குகளை வேறு வாகனத்திற்கு மாற்றும் (transshipment) அவசியம் இல்லாமலேயே, கன்டெய்னர் சரக்குகளை நேரடியாக ரயிலில் கொண்டு செல்ல முடிகிறது.
இந்த புதிய ஏற்பாடு பயண நேரம், சரக்குக் கையாளுதல் மற்றும் போக்குவரத்துச் செலவுகளைக் குறைப்பதோடு, இரு அண்டை நாடுகளுக்கும் இடையிலான எல்லை தாண்டிய வர்த்தகத்தின் செயல்திறன், நம்பகத்தன்மை மற்றும் போட்டித்தன்மையை மேம்படுத்தும் என்று எதிர்பார்க்கப்படுகிறது.
வேகமான, சிக்கனமான மற்றும் சுற்றுச்சூழலுக்கு உகந்த போக்குவரத்து முறையை வழங்குவதன் மூலம், இறக்குமதி மற்றும் ஏற்றுமதி சரக்கு போக்குவரத்திற்கு இந்த நேரடி சரக்கு சேவை குறிப்பிடத்தக்க ஊக்கத்தை அளிக்கும் என்றும் அமைச்சகம் கூறியது.
சரக்குகளைப் பல இடங்களில் கையாள்வதைக் குறைப்பதன் மூலமும், விநியோகச் சங்கிலிச் செயல்திறனை மேம்படுத்துவதன் மூலமும், இந்த முயற்சி ஏற்றுமதியாளர்கள், இறக்குமதியாளர்கள், போக்குவரத்துச் சேவை நிறுவனங்கள் மற்றும் எல்லை தாண்டிய வர்த்தகத்தில் ஈடுபட்டுள்ள தொழில்துறையினருக்குப் பயனளிக்கும் என்றும் அது மேலும் தெரிவித்தது.