புது தில்லியில் பல்வேறு பிரிவுகளில் 2023 ஆம் ஆண்டிற்கான 71வது தேசிய திரைப்பட விருதுகளை ஜனாதிபதி திரௌபதி முர்மு இன்று வழங்கினார். புகழ்பெற்ற நடிகர், இயக்குனர் மற்றும் தயாரிப்பாளரான மோகன்லாலுக்கு, இந்திய சினிமாவுக்கு அவர் ஆற்றிய பங்களிப்பிற்காக, சினிமா துறையில் மிக உயர்ந்த அங்கீகாரமான தாதாசாகேப் பால்கே விருது வழங்கப்பட்டது.
விருதுகளை வழங்கிய பின்னர் கூட்டத்தில் உரையாற்றிய ஜனாதிபதி, சினிமா என்பது வெறும் தொழில் மட்டுமல்ல, சமூகத்தில் விழிப்புணர்வை ஏற்படுத்துவதற்கும் குடிமக்களை மேலும் உணர்திறன் மிக்கவர்களாக மாற்றுவதற்கும் ஒரு சக்திவாய்ந்த ஊடகம் என்றும் வலியுறுத்தினார். உலக அளவில் இந்திய திரைப்படங்கள் அதிக அங்கீகாரம் பெறுவதை உறுதி செய்ய திரைப்படத் துறையின் அனைத்து பங்குதாரர்களும் முயற்சிகளை மேற்கொள்ள வேண்டும் என்று அவர் வலியுறுத்தினார். பெண்களை மையமாகக் கொண்ட திரைப்படங்கள் தயாரிக்கப்பட்டு விருதுகளைப் பெறுவது மிகவும் நேர்மறையான சமூக அறிகுறியாகும் என்றும் ஜனாதிபதி மகிழ்ச்சி தெரிவித்தார்.
இந்த நிகழ்வில் பேசிய தகவல் மற்றும் ஒளிபரப்பு அமைச்சர் அஸ்வினி வைஷ்ணவ், பிரதமர் நரேந்திர மோடிக்கு இந்தியாவை உள்ளடக்க உருவாக்கத்திற்கான மையமாக மாற்றுவதற்கான தெளிவான தொலைநோக்கு பார்வை இருப்பதாகக் கூறினார். நாட்டின் உள்ளடக்க உருவாக்குநர்களின் தயாரிப்புகள் இப்போது வேவ்ஸ் பஜாரின் உதவியுடன் புதிய சந்தைகளைக் கண்டுபிடித்து வருவதாக அவர் கூறினார். மும்பையில் உள்ள தேசிய திரைப்பட மேம்பாட்டுக் கழக வளாகத்தில் முதல் இந்திய படைப்பாற்றல் தொழில்நுட்ப நிறுவனம் தற்போது செயல்பட்டு வருவதாகவும், இந்த நிறுவனத்தில் ஏற்கனவே பதினேழு படிப்புகள் தொடங்கப்பட்டுள்ளதாகவும் அமைச்சர் கூறினார்.
சிறந்த திரைப்பட விருது ’12வது பெயில்’ என்ற இந்தி திரைப்படத்திற்கும், சிறந்த இந்தி திரைப்பட விருது ‘காதல்: எ ஜாக்ஃப்ரூட் மிஸ்டரி’ படத்திற்கும் வழங்கப்பட்டது. சிறந்த நடிகர் பிரிவில், நடிகர் ஷாருக்கான் தனது ‘ஜவான்’ படத்திற்காக கௌரவிக்கப்பட்டார், நடிகர் விக்ராந்த் மாஸ்ஸி 12வது பெயில் படத்திற்காக கௌரவிக்கப்பட்டார். சிறந்த நடிகைக்கான விருது நடிகை ராணி முகர்ஜிக்கு திருமதி சட்டர்ஜி vs. நார்வே படத்தில் நடித்ததற்காக வழங்கப்பட்டது.
சுதிப்தோ சென்னின் ‘தி கேரளா ஸ்டோரி’ சிறந்த இயக்குநருக்கான விருதையும், சிறந்த பொழுதுபோக்கு படத்திற்கான விருதை இந்தி திரைப்படமான ‘ராக்கி அவுர் ராணி கீ பிரேம் கஹானி’ பெற்றுள்ளது. சிறந்த பின்னணிப் பாடகிக்கான விருதை ஜவான் என்ற படத்திற்காக பாடகி ஷில்பா ராவ் பெற்றார்.