மதுரை அரசு ராஜாஜி மருத்துவமனையில் தமிழக முதல்வர் விஜய் வருகையை முன்னிட்டு சீரமைப்பு மற்றும் முன்னேற்பாட்டுப் பணிகள் தீவிரமாக நடைபெற்று வருகின்றன. மருத்துவமனை வளாகம் மற்றும் அதைச் சுற்றியுள்ள பகுதிகளில் சாலைகள் சீரமைப்பு, நடைபாதை அமைத்தல், சுவர்களுக்கு வண்ணம் பூசுதல், தூய்மைப் பணிகள் உள்ளிட்டவை வேகப்படுத்தப்பட்டுள்ளன.
தமிழக அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் ‘தாய்மாமன் தங்க மோதிரம்’ திட்டத்தின் தொடக்க விழா செப்டம்பர் 28-ஆம் தேதி மதுரை அரசு ராஜாஜி மருத்துவமனையில் நடைபெற உள்ளது. முதலில் இந்த விழா உசிலம்பட்டி அரசு மருத்துவமனையில் நடைபெறும் என எதிர்பார்க்கப்பட்ட நிலையில், பாதுகாப்பு மற்றும் கூட்ட நெரிசல் உள்ளிட்ட காரணங்களால் விழா நடைபெறும் இடம் மதுரை ராஜாஜி மருத்துவமனைக்கு மாற்றப்பட்டதாக தகவல்கள் வெளியாகியுள்ளன.
முதல்வர் வருகையையொட்டி ராஜாஜி மருத்துவமனையைச் சுற்றியுள்ள முக்கிய சாலைகள் மற்றும் மருத்துவமனைக்குள் உள்ள சேதமடைந்த பகுதிகளில் சீரமைப்புப் பணிகள் மேற்கொள்ளப்பட்டு வருகின்றன. மருத்துவமனை வளாகத்தின் சில பகுதிகளில் சேதமடைந்த நடைபாதைகள் அகற்றப்பட்டு புதிய பேவர் பிளாக் கற்கள் பதிக்கும் பணிகளும் நடைபெறுகின்றன. நீண்ட காலமாக பராமரிப்பு இல்லாமல் இருந்த சுவர்களுக்கு வெள்ளையடித்து, வண்ணம் பூசும் பணிகளும் ஒரே நேரத்தில் மேற்கொள்ளப்பட்டு வருவதாக தகவல்கள் தெரிவிக்கின்றன.
மருத்துவமனையைச் சுற்றியுள்ள சாலைகள் மற்றும் நடைபாதைகளில் இருந்த ஆக்கிரமிப்புகளை அகற்ற மாநகராட்சி அதிகாரிகள் நடவடிக்கை எடுத்துள்ளனர். கடைகள் மற்றும் நடைபாதைகளை ஆக்கிரமித்திருந்தவர்களை அகற்றுவதுடன், பேனர்கள் மற்றும் சுவரொட்டிகளும் அகற்றப்பட்டன. மேலும், மருத்துவமனைக்கு அருகிலுள்ள பகுதிகளில் தூய்மையைப் பேண வேண்டும் என்றும், நடைபாதைகளை ஆக்கிரமிக்கக் கூடாது என்றும் அதிகாரிகள் அறிவுறுத்தியுள்ளனர்.
முதல்வர் வருகைக்காக பணிகள் வேகப்படுத்தப்பட்டுள்ள நிலையில், மருத்துவமனைக்கு சிகிச்சைக்காக வரும் நோயாளிகள் மற்றும் அவர்களது உறவினர்களுக்கு சில இடங்களில் இடையூறு ஏற்பட்டதாக தகவல்கள் வெளியாகியுள்ளன. மருத்துவமனையைச் சுற்றியுள்ள பகுதிகளில் திடீரென சீரமைப்பு மற்றும் தூய்மைப் பணிகள் மேற்கொள்ளப்படுவதால் போக்குவரத்திலும் மாற்றங்கள் ஏற்பட்டுள்ளன. அதேவேளை, இந்தப் பணிகள் முதல்வர் வருகைக்காக புதிதாக தொடங்கப்பட்டவை மட்டுமல்ல என்றும், ஏற்கனவே திட்டமிடப்பட்டிருந்த சீரமைப்புப் பணிகள் தற்போது வேகப்படுத்தப்பட்டுள்ளதாக மாநகராட்சி அதிகாரி ஒருவர் தெரிவித்தார்.
முதல்வர் வருகையையொட்டி பாதுகாப்பு ஏற்பாடுகளும் தீவிரப்படுத்தப்பட்டுள்ளன. மதுரை மாநகர காவல் ஆணையர், மாநகராட்சி ஆணையர் மற்றும் மருத்துவமனை நிர்வாகத்தினர் இணைந்து மருத்துவமனை வளாகத்தை ஆய்வு செய்து வருகின்றனர். முதல்வர் நிகழ்ச்சியில் குழந்தைகளுக்கு தங்க மோதிரம் வழங்குவதுடன், அன்றைய தினம் பிறக்கும் குழந்தைகளுக்கு பிரசவ வார்டுக்குச் சென்று நேரடியாக மோதிரம் வழங்கத் திட்டமிடப்பட்டுள்ளதாகவும் தகவல்கள் வெளியாகியுள்ளன.
இதனிடையே, முதல்வர் வருகைக்காக மட்டும் சீரமைப்புப் பணிகள் மேற்கொள்ளப்படாமல், மதுரை ராஜாஜி அரசு மருத்துவமனையின் நீண்டகால அடிப்படை வசதிகளும் தொடர்ந்து மேம்படுத்தப்பட வேண்டும் என பொதுமக்கள் மற்றும் சமூக ஆர்வலர்கள் வலியுறுத்தியுள்ளனர்.