ஸ்ரீகாகுளம் மாவட்டத்தில் உள்ள காசிபுக்கா வெங்கடேஸ்வர சுவாமி கோயிலில் இன்று சனிக்கிழமை (நவம்பர் 1) நடைபெற்ற தொக்கிலாட்ட சடங்கின் போது ஏற்பட்ட கூட்ட நெரிசலில் சிக்கி குறைந்தது ஒன்பது பேர் கொல்லப்பட்டனர் மற்றும் பலர் காயமடைந்தனர். ஏகாதசி தினம் என்பதால் கோயிலில் ஏராளமான பக்தர்கள் கூடியிருந்தனர். நிலைமையைக் கட்டுப்படுத்த அதிகாரிகள் தீவிரமாக செயல்பட்டு வருகின்றனர், மேலும் சம்பவ இடத்தில் கூடுதல் போலீசார் நிறுத்தப்பட்டுள்ளனர். அதிகாரிகள் நிலைமையை ஆய்வு செய்து கண்காணித்து வருகின்றனர்.
இந்த துயர சம்பவம் குறித்து ஆந்திர முதல்வர் சந்திரபாபு நாயுடு தனது அதிர்ச்சியை தெரிவித்துக் கொண்டார், உயிரிழந்தவர்களின் குடும்பங்களுக்கு ஆழ்ந்த இரங்கலைத் தெரிவித்தார். “ஸ்ரீகாகுளம் மாவட்டத்தில் உள்ள காஷிபுக்காவில் உள்ள வெங்கடேஸ்வரா கோயிலில் ஏற்பட்ட கூட்ட நெரிசல் சம்பவம் அதிர்ச்சியை ஏற்படுத்தியுள்ளது. இந்த துயர சம்பவத்தில் பக்தர்களின் மரணம் மிகவும் வேதனையளிக்கிறது. இறந்தவர்களின் குடும்பங்களுக்கு எனது ஆழ்ந்த இரங்கலைத் தெரிவித்துக் கொள்கிறேன். காயமடைந்தவர்களுக்கு விரைவான மற்றும் முறையான சிகிச்சை அளிக்குமாறு அதிகாரிகளுக்கு அறிவுறுத்தியுள்ளேன். சம்பவ இடத்திற்கு உள்ளூர் அதிகாரிகள் மற்றும் மக்கள் பிரதிநிதிகள் வருகை தந்து நிவாரண நடவடிக்கைகளை மேற்பார்வையிடுமாறு கேட்டுக் கொண்டுள்ளேன்,” என்று சந்திரபாபு நாயுடு கூறியுள்ளார்.
இந்த துயர சம்பவம் குறித்து மாநில வேளாண் அமைச்சர் கிஞ்சரபு அச்சன்நாயுடு தனது ஆழ்ந்த அதிர்ச்சியை வெளிப்படுத்தி, உயிரிழந்தவர்களின் குடும்பத்தினருக்கு இரங்கல் தெரிவித்தார். கூட்ட நெரிசல் குறித்து அறிந்ததும் அவர் உடனடியாக கோயிலுக்குச் சென்று காயமடைந்தவர்களுக்கு முறையான மருத்துவ சிகிச்சையை உறுதி செய்யுமாறு அதிகாரிகளுக்கு உத்தரவிட்டார்.