
சென்னையில் அமைக்கப்பட்டுள்ள ஒருங்கிணைந்த கட்டுப்பாட்டு மையம் மூலம் மேட்டூர் அணையைத் திறக்க முடியும் என்று நீர்வளத் துறை அதிகாரி தெரிவித்தார். இதன் மூலம், அணையின் மதகுகளை இயக்க இனி சம்பந்தப்பட்ட இடத்துக்கே செல்ல வேண்டிய அவசியம் இல்லை.
இந்த ஒருங்கிணைந்த கட்டுப்பாட்டு மையம் சென்னை காமராஜர் சாலையில், நேப்பியர் பாலம் அருகே அமைக்கப்பட்டுள்ளது. சென்னையில் உள்ள இந்த மைய அலுவலகத்துடன் இணைக்கும் வகையில், தொடர்புடைய ஏரிகளில் துணை கட்டுப்பாட்டு மையங்கள் அமைக்கப்பட்டுள்ளன. தலைமை மையத்துக்கும் இந்த துணை மையங்களுக்கும் இடையிலான இணைப்பே, தொலைவில் இருந்து மதகுகளை இயக்க உதவுகிறது.
தேவைப்படும் நேரத்தில், சென்னையில் உள்ள கட்டுப்பாட்டு மையத்தில் இருந்தே ஏரிகளின் மதகுகள் மற்றும் கதவுகளை ஆன்லைன் வழியாகத் திறந்து, தண்ணீரை வெளியேற்ற முடியும். மேட்டூர் அணையைப் பொறுத்தவரை, அதிகாரிகள் சென்னை மையத்துக்கு வந்து ஒரு பட்டனை அழுத்தினாலே அணையில் இருந்து நீரைத் திறந்துவிட முடியும்.
மழைக்காலங்களில் நீர்நிலைகளில் நீர்மட்டம் வேகமாக உயரும்போது, பல இடங்களில் உள்ள மதகுகளை ஒரே நேரத்தில், ஒருங்கிணைந்த முறையில் இயக்க இந்த மையம் உதவும்.
