தமிழக காவல்துறையில் என்கவுன்டர் ஸ்பெஷலிஸ்ட் என்று அழைக்கப்படும் ஓய்வுபெற்ற கூடுதல் காவல் கண்காணிப்பாளர் வெள்ளத்துரை, அ.தி.மு.க பொதுச்செயலாளர் எடப்பாடி பழனிசாமி முன்னிலையில் அக்கட்சியில் இணைந்துள்ளார். முன்னதாக, சசிகலாவின் கட்சியில் இணைந்து சட்டமன்றத் தேர்தலில் போட்டியிட்ட அவர், தற்போது அ.தி.மு.க-வில் இணைந்திருப்பது தமிழக அரசியல் வட்டாரத்தில் கவனம் பெற்றுள்ளது.
சென்னை ராயப்பேட்டையில் உள்ள அ.தி.மு.க தலைமை அலுவலகமான எம்.ஜி.ஆர் மாளிகையில் நேற்று (நவம்பர் 1) இந்த இணைப்பு நிகழ்ச்சி நடைபெற்றது. அப்போது அ.தி.மு.க பொதுச்செயலாளரும், முன்னாள் முதலமைச்சருமான எடப்பாடி பழனிசாமியை நேரில் சந்தித்த ஓய்வுபெற்ற கூடுதல் காவல் கண்காணிப்பாளர் (ஏ.டி.எஸ்.பி) வெள்ளத்துரை, தன்னை அக்கட்சியின் அடிப்படை உறுப்பினராக இணைத்துக் கொண்டார்.
இதுகுறித்து அ.தி.மு.க தலைமை வெளியிட்டுள்ள அறிவிப்பிலும் வெள்ளத்துரை கட்சியில் இணைந்திருப்பது உறுதிப்படுத்தப்பட்டுள்ளது. இந்த நிகழ்ச்சியில் அ.தி.மு.க துணைப் பொதுச்செயலாளர் கே.பி.முனுசாமி, பொருளாளர் திண்டுக்கல் சீனிவாசன், முன்னாள் அமைச்சர் ஆர்.பி.உதயகுமார் உள்ளிட்ட கட்சி நிர்வாகிகள் உடனிருந்தனர்.
தூத்துக்குடி மாவட்டத்தைச் சேர்ந்த வெள்ளத்துரை, தமிழக காவல்துறையில் அதிரடி நடவடிக்கைகளுக்குப் பெயர் பெற்றவர். காவல்துறையில் பணியாற்றிய காலத்தில் பல்வேறு முக்கியமான என்கவுன்டர் நடவடிக்கைகளில் ஈடுபட்டதால் ‘என்கவுன்டர் ஸ்பெஷலிஸ்ட்’ என்று அழைக்கப்பட்டார். கடந்த 1997-ம் ஆண்டு புதுக்கோட்டை மாவட்டம் கீரனூர் காவல் நிலையத்தில் உதவி ஆய்வாளராகத் தனது காவல் பணியைத் தொடங்கினார்.
பின்னர் திருச்சி பாலக்கரை காவல் நிலையத்தில் பணியாற்றியபோது, 1998-ம் ஆண்டு கோ.சி. ஜான் என்ற ரவுடியை என்கவுன்டர் செய்த சம்பவம் மூலம் கவனம் பெற்றார். தொடர்ந்து, 2003-ம் ஆண்டு சென்னையில் நடைபெற்ற அயோத்திகுப்பம் வீரமணி என்கவுன்டர் நடவடிக்கையிலும், 2004-ம் ஆண்டு சந்தனக் கடத்தல் வீரப்பனைப் பிடிப்பதற்காக நடைபெற்ற சிறப்பு அதிரடிப்படை நடவடிக்கையிலும் முக்கியப் பங்காற்றியதாகக் கூறப்படுகிறது.
இதுதவிர, மதுரையில் நடைபெற்ற இரட்டை என்கவுன்டர் உள்ளிட்ட பல்வேறு முக்கிய காவல்துறை நடவடிக்கைகளிலும் அவர் பணியாற்றியுள்ளார். 12-க்கும் மேற்பட்ட என்கவுன்டர் நடவடிக்கைகளில் அவர் ஈடுபட்டதாக ஊடகச் செய்திகள் தெரிவிக்கின்றன. வெள்ளத்துரையின் காவல்துறைப் பணிக்காலத்தில் சர்ச்சைக்குரிய சம்பவங்களும் இடம்பெற்றுள்ளன. சிவகங்கை மாவட்டம் திருப்பாச்சேத்தியில் நடைபெற்ற காவல் மரண வழக்கு தொடர்பாக, அப்போது டி.எஸ்.பி.யாகப் பணியாற்றிய வெள்ளத்துரை மீது நடவடிக்கை எடுக்கப்பட்டது.
கடந்த 2024-ம் ஆண்டு மே 31-ம் தேதி அவர் காவல்துறையில் இருந்து ஓய்வுபெற இருந்த நிலையில், ஓய்வுக்கு முந்தைய நாளான மே 30-ம் தேதி பணியிடை நீக்கம் செய்யப்பட்டார். இந்தச் சம்பவம் அப்போது தமிழக அரசியல் மற்றும் காவல்துறை வட்டாரங்களில் பெரும் விவாதத்தை ஏற்படுத்தியது. பின்னர் அவர் கூடுதல் காவல் கண்காணிப்பாளர் (ஏ.டி.எஸ்.பி) பதவியிலிருந்து ஓய்வுபெற்றார்.
காவல்துறைப் பணியில் இருந்து ஓய்வுபெற்ற பின்னர் அரசியலில் ஆர்வம் காட்டிய வெள்ளத்துரை, சசிகலா தலைமையிலான அனைத்திந்திய புரட்சித் தலைவர் மக்கள் முன்னேற்றக் கழகத்தில் இணைந்தார். தொடர்ந்து, 2026 சட்டமன்றப் பொதுத்தேர்தலில் அக்கட்சியின் சார்பில் நாங்குநேரி தொகுதியில் போட்டியிட்டார். ஆனால், அந்தத் தேர்தலில் அவருக்கு 1,048 வாக்குகள் மட்டுமே கிடைத்தன.
இதற்கிடையே, கட்சியின் உள்கட்சி விவகாரங்கள் காரணமாக சசிகலா கட்சித் தலைவர் பொறுப்பில் இருந்து நீக்கப்பட்டதாக செய்திகள் வெளியாகின. இந்தச் சூழலில், அந்தக் கட்சியிலிருந்து விலகி தற்போது வெள்ளத்துரை அ.தி.மு.க-வில் இணைந்துள்ளார்.
வெள்ளத்துரையின் அ.தி.மு.க வருகை தென் மாவட்ட அரசியலில் முக்கியத்துவம் பெற்றுள்ளது. குறிப்பாக, அம்பாசமுத்திரம் சட்டமன்றத் தொகுதியில் இடைத்தேர்தல் நடைபெறவுள்ள சூழலில் அவரது அரசியல் வருகை கவனத்தை ஈர்த்துள்ளது. அம்பாசமுத்திரம் தொகுதியில் அவரை வேட்பாளராக நிறுத்துவது குறித்து அ.தி.மு.க தலைமை ஆலோசித்து வருவதாகவும் அரசியல் வட்டாரங்களில் தகவல்கள் வெளியாகியுள்ளன.
காவல்துறையில் அதிரடி நடவடிக்கைகள் மூலம் பிரபலமான வெள்ளத்துரை, தற்போது அரசியல் களத்தில் தனது பயணத்தை அ.தி.மு.க மூலம் தொடர முடிவு செய்துள்ளார். அவருக்கு அக்கட்சியில் என்ன பொறுப்பு வழங்கப்படும்? அம்பாசமுத்திரம் இடைத்தேர்தலில் போட்டியிட வாய்ப்பு கிடைக்குமா? என்பதைப் பொறுத்திருந்துதான் பார்க்க வேண்டும்.