திபெத்தின் நாக்சு (Nagqu) நகரில் உள்ள பாக்கன் (Baqen) கவுண்டியில் நேற்று, அக்டோபர் 22 மாலை 7.0 ரிக்டர் அளவில் நிலநடுக்கம் ஏற்பட்டது. இதில் 16 பேர் உயிரிழந்தனர், 40-க்கும் மேற்பட்டோர் காயமடைந்தனர். நூற்றுக்கணக்கான வீடுகள் இடிந்து விழுந்தன, மேலும் நிலச்சரிவுகளும் ஏற்பட்டன. பாதிக்கப்பட்டவர்களுக்கு உதவவும், அவசரக்கால நிவாரணங்களை வழங்கவும் 1,600-க்கும் மேற்பட்ட பணியாளர்கள் களமிறக்கப்பட்டு, மீட்புப் பணிகள் தீவிரமாக நடைபெற்று வருகின்றன.
நாக்சு ஊடக அலுவலகத்தின் தகவல்படி, இந்த நிலநடுக்கத்தால் குறைந்தது 339 வீடுகளும், கால்நடைகளுக்கான 20 கொட்டகைகளும் இடிந்து விழுந்துள்ளன. காயமடைந்த 46 பேரில், 11 பேரின் நிலை கவலைக்கிடமாக உள்ளது. இப்பகுதியின் சில இடங்களில் தொலைத்தொடர்பு சேவைகள் பாதிக்கப்பட்டுள்ளன; முன்னெச்சரிக்கை நடவடிக்கையாக ரயில் சேவைகளும் நிறுத்தப்பட்டுள்ளன.
இதற்கிடையில், பாதிக்கப்பட்ட பகுதியில் அடுத்த மூன்று நாட்களுக்கு அவ்வப்போது பனிப்பொழிவு இருக்கும் என்று கணிக்கப்பட்டுள்ளது. இது, நிலநடுக்கத்தால் வீடுகளை இழந்த மக்களுக்கும், மீட்புப் பணியில் ஈடுபட்டுள்ளவர்களுக்கும் கூடுதல் சவாலாக அமையும் என்று அஞ்சப்படுகிறது.
இந்தியாவின் தேசிய நிலநடுக்கவியல் மையத்தின் (National Centre for Seismology) தகவல்படி, இந்த நிலநடுக்கம் இந்திய நேரப்படி இரவு 8:03 மணிக்கு நாக்சு நகரில் ஏற்பட்டது. இது லாசாவிலிருந்து சுமார் 400 கிலோமீட்டர் தொலைவில், 173 கிலோமீட்டர் ஆழத்தில் மையம் கொண்டிருந்தது.