வினாத்தாள் கசிவு சம்பவம் நிகழ்ந்ததிலிருந்து கடந்த இரண்டரை மாதங்களில் பல்வேறு நடவடிக்கைகள் எடுக்கப்பட்டுள்ளதாக பிரதமர் நரேந்திர மோடி தெரிவித்துள்ளார். குற்றவாளிகள் கைது செய்யப்பட்டு சிறையில் அடைக்கப்பட்டுள்ளதாகவும் அவர் கூறினார்.
வெளியிட்ட காணொளிச் செய்தியில், மாணவர்கள் ஒரு கல்வி ஆண்டை இழக்காமல் இருப்பதை உறுதி செய்வதே அரசின் முதன்மையான பொறுப்பு என்றும், தேர்வுகள் மிக விரைவில் நடத்தப்பட வேண்டியது அவசியம் என்றும் பிரதமர் குறிப்பிட்டார். வினாத்தாள் கசிவு என்பது சாதாரணமான விவகாரம் அல்ல என்றும், இது லட்சக்கணக்கான மாணவர்களுக்கும் அவர்களது பெற்றோருக்கும் மிகுந்த வேதனையை அளிப்பதாகவும் அவர் கூறினார்.
விரைவு நீதிமன்றங்களை அமைப்பதற்கான முன்மொழிவைத் தயாரிக்குமாறு நேற்று சம்பந்தப்பட்ட துறைகளுக்கு உத்தரவிட்டதாக பிரதமர் மோடி தெரிவித்தார். அந்தத் துறைகள் தொடர்ந்து பணியாற்றி, நேற்றிரவு அதற்கான வரைவு அறிக்கையைத் தன்னிடம் சமர்ப்பித்ததாகவும் அவர் கூறினார்.
விரைவு நீதிமன்றங்கள் மற்றும் கடுமையான தண்டனைகளுக்கான அம்சங்களை உள்ளடக்கிய இந்த வரைவு அறிக்கை குறித்து இன்று அமைச்சரவையில் விவாதிக்கப்படும் என்று பிரதமர் தெரிவித்தார். அமைச்சரவை சகாக்களின் ஆலோசனைகள் மற்றும் கருத்துகள் சேர்க்கப்பட்ட பிறகு, இது இறுதி வடிவம் பெறும் என்றும் அவர் குறிப்பிட்டார்.
நாடாளுமன்றத்தின் இரண்டாவது வாரம் திங்கட்கிழமை தொடங்கவுள்ள நிலையில், இந்த மசோதாவை நாடாளுமன்றத்தில் மிக விரைவில் நிறைவேற்ற அரசு அனைத்து முயற்சிகளையும் மேற்கொள்ளும் என்று திரு மோடி கூறினார்.