அமெரிக்க அதிபர் டொனால்ட் டிரம்ப் வெள்ளிக்கிழமை (பிப்ரவரி 6) அன்று, இந்தியாவுடனான புதிதாக அறிவிக்கப்பட்ட வர்த்தக ஒப்பந்தத்தை நடைமுறைப்படுத்துவதற்கான முதல் உறுதியான நடவடிக்கையைத் தொடங்கினார். ரஷ்ய எண்ணெயை இந்தியா வாங்கியதற்காக அவர் விதித்த 25 சதவீத வரியை அவர் நீக்கினார். இந்தியப் பொருட்கள் மீதான கூடுதல் 25 சதவீத வரியை நீக்குவதற்கான நிர்வாக உத்தரத்தில் டிரம்ப் கையெழுத்திட்டார். இரு நாடுகளுக்கும் இடையே பல மாதங்களாக நிலவி வந்த வர்த்தகப் பதட்டங்களுக்குப் பிறகு இந்த நடவடிக்கை எடுக்கப்பட்டுள்ளது.
வெள்ளிக்கிழமை கையெழுத்திடப்பட்ட நிர்வாக உத்தரவின்படி, “ரஷ்ய கூட்டமைப்பின் எண்ணெயை நேரடியாகவோ அல்லது மறைமுகமாகவோ இறக்குமதி செய்வதை நிறுத்த இந்தியா உறுதியளித்துள்ளது”. இந்தியா அமெரிக்கப் பொருட்களின் கொள்முதலை கணிசமாக விரிவுபடுத்த உத்தேசித்துள்ளது என்றும், அடுத்த 10 ஆண்டுகளில் பாதுகாப்பு ஒத்துழைப்பை விரிவுபடுத்துவதற்காக அமெரிக்காவுடன் சமீபத்தில் ஒரு கட்டமைப்பு ஒப்பந்தத்தில் ஈடுபட்டுள்ளது என்றும் அது மேலும் கூறுகிறது.
இந்தத் வரி குறைப்பு இன்று சனிக்கிழமை (பிப்ரவரி 7) அமெரிக்க கிழக்கு நேரப்படி அதிகாலை 12:01 மணிக்கு முதல் நடைமுறைக்கு வந்தது. இது அமெரிக்கச் சந்தையில் அதிக வரிச்சுமையை எதிர்கொண்டு வந்த இந்திய ஏற்றுமதியாளர்கள் மீதான அழுத்தத்தைக் குறைத்துள்ளது.
உக்ரைன் போரின் போது இந்தியா தொடர்ந்து ரஷ்ய கச்சா எண்ணெயை வாங்கியது தொடர்பான கருத்து வேறுபாடுகளால் பாதிக்கப்பட்ட பொருளாதார உறவுகளைச் சீரமைப்பதை நோக்கமாகக் கொண்ட, இந்தியாவுடனான ஒரு பரந்த வர்த்தக ஒப்பந்தம் குறித்த ட்ரம்பின் இந்த வாரத் தொடக்க அறிவிப்பைத் தொடர்ந்து இந்த நடவடிக்கை எடுக்கப்பட்டுள்ளது.
உடனடித் வரி குறைப்பிற்கு அப்பால், இந்த ஒப்பந்தத்தின்படி, இந்தியப் பொருட்கள் மீதான பரஸ்பர வரிகளை அமெரிக்கா முந்தைய 25 சதவீதத்திலிருந்து 18 சதவீதமாகக் குறைக்கும். இருப்பினும், அந்தக் குறைப்பைச் செயல்படுத்துவதற்கான காலக்கெடு இன்னும் இறுதி செய்யப்படவில்லை.