இந்திய கடலோரக் காவல்படை (ICG) தனது முதல் மாசுக் கட்டுப்பாட்டுக் கப்பலான ‘சமுத்திர பிரதாப்‘-ஐ இன்று கோவா கப்பல் கட்டும் தளத்தில் (GSL) இணைத்துக்கொண்டது. ‘சமுத்திர பிரதாப்’ என்பது இந்திய கடலோரக் காவல்படையின் உள்நாட்டிலேயே வடிவமைத்து கட்டப்பட்ட முதல் மாசுக் கட்டுப்பாட்டுக் கப்பலாகும். இணைப்பு விழாவின் போது, இந்தக் கப்பல் முறையாக கடலோரக் காவல்படையிடம் ஒப்படைக்கப்பட்டது.
இந்தக் கப்பல் அதிநவீன தொழில்நுட்பங்களுடன், 30 மில்லிமீட்டர் CRN-91 துப்பாக்கி, ஒருங்கிணைந்த தீக்கட்டுப்பாட்டு அமைப்புகளுடன் கூடிய இரண்டு 12.7 மில்லிமீட்டர் நிலைப்படுத்தப்பட்ட தொலைவுக் கட்டுப்பாட்டுத் துப்பாக்கிகள் மற்றும் உள்நாட்டிலேயே உருவாக்கப்பட்ட அமைப்புகள் உள்ளிட்ட அம்சங்களைக் கொண்டுள்ளது. இது ஒரு ஷாஃப்ட் ஜெனரேட்டர், ஒரு கடல் படகு தூக்கி, தூக்கியுடன் கூடிய மாசுக் கட்டுப்பாட்டுப் படகு மற்றும் உயர் திறன் கொண்ட வெளிப்புறத் தீயணைப்பு அமைப்பு ஆகியவற்றையும் கொண்டுள்ளது.
‘சமுத்திர பிரதாப்‘ கப்பல்தான், இந்திய கடலோரக் காவல்படை கப்பல் தொகுப்பில் உள்ளிழுக்கக்கூடிய பின்புற உந்துவிசை அமைப்பு, டைனமிக் பொசிஷனிங் சிஸ்டம் மற்றும் ஃப்ளஷ்-வகை பக்கவாட்டுத் துடைப்பு கரங்களைக் கொண்ட முதல் மாசுக் கட்டுப்பாட்டுக் கப்பலாகும். இந்தக் கப்பல் முக்கிய மாசுக் கட்டுப்பாட்டு உபகரணங்களுடன் பொருத்தப்பட்டுள்ளது. இது ஆத்மநிர்பர் பாரத் மற்றும் மேக் இன் இந்தியா முன்முயற்சிகளுக்கு இணங்க, 60 சதவீதத்திற்கும் அதிகமான உள்நாட்டு உள்ளடக்கத்தைக் கொண்டுள்ளது.
இந்த மாசுக் கட்டுப்பாட்டுக் கப்பல், கடல்சார் மாசுக் கட்டுப்பாட்டு விதிமுறைகளை அமல்படுத்துதல், கடல்சார் சட்ட அமலாக்கம், தேடல் மற்றும் மீட்பு நடவடிக்கைகள் மற்றும் இந்தியாவின் பிரத்யேக பொருளாதார மண்டலத்தைப் பாதுகாத்தல் ஆகியவற்றிற்கு ஒரு முக்கிய தளமாகச் செயல்படும்.