புதுடில்லி: இந்தியாவின் தேசியப் பாடலான ‘வந்தே மாதரம்’ 150 ஆண்டுகளை நிறைவு செய்ததை முன்னிட்டு, லோக்சபாவில் நடைபெற்ற சிறப்பு விவாதத்தில் பிரதமர் நரேந்திர மோடி கலந்து கொண்டு, உணர்ச்சிப் பூர்வமாக உரையாற்றினார். இந்த உரையின்போது, அவர் தமிழ் கவிஞர் சுப்ரமணிய பாரதியாரின் ‘தாயின் மணிக்கொடி பாரீர்’ பாடலை மேடையில் உணர்ச்சி பொங்க பாடியதால், பார்லிமென்ட் அரங்கமே கைதட்டலால் முழங்கியது.
வந்தே மாதரம் குறித்து உரையாற்றிய பிரதமர் மோடி கூறியதாவது:
“வந்தே மாதரம் 150வது ஆண்டு விழா விவாதத்தில் பங்கேற்பது ஒரு வரலாற்றுச் சிறப்பான தருணம். இது வெறும் ஒரு பாடல் அல்ல – நாட்டின் சுதந்திர தாய்க்கான பாடல். சுதந்திரப் போராட்ட வீரர்களை ஊக்குவித்த முழக்கம். வந்தே மாதரம் என்பதில் ஆளும் கட்சி – எதிர்க்கட்சி என்னும் நிலைப்பாடுகள் இல்லை. இந்த முழக்கத்தால் தான் இன்று நாமெல்லாம் சுதந்திரமாக இங்கு அமர்ந்திருக்கிறோம்.”
பிரிட்டிஷ் ஆட்சிக்கு எதிராக 1875ல் பங்கிம் சந்திர சேட்டர்ஜி எழுதிய வந்தே மாதரம் பல கட்டங்களை கடந்து வந்ததாகவும், அது இந்தியர்களை ஒன்றிணைத்ததாகவும் அவர் குறிப்பிட்டார்.
வ.உ.சி மற்றும் பாரதியாருக்கு மோடி புகழாரம்:
சுதந்திரப் போராட்டத்தில் தமிழகத்தின் பெருமையைச் சுட்டிக்காட்டிய பிரதமர் கூறினார்:
“ஆங்கிலேயர்களுக்கு எதிராக கப்பல் ஓட்டி போர்க்குரலாக எழுச்சி கிளப்பியது கப்பலோட்டிய தமிழன் வ.உ.சி. அதேபோல், கவிஞர் சுப்ரமணிய பாரதி தனது கவிதைகளால் ஆங்கிலேயர்களை நடுங்க வைத்தார்.” அதையடுத்து, அவர் பாரதியாரின் ‘தாயின் மணிக்கொடி பாரீர்’ பாடலை உணர்ச்சியோடு பாடி காட்டினார்.
வந்தே மாதரம் மீது நடந்த கருத்து வேறுபாடுகள்:
முன்னாள் நாட்களில் ஏற்பட்ட அரசியல் சர்ச்சைகளைப் பற்றி பேசும் போது, பிரதமர் மோடி கூறினார்:
“முன்னாள் பிரதமர் நேருவின் முடிவினால் வந்தே மாதரம் தேசிய கீதமாக அறிவிக்கப்படாமல் போனது. முஸ்லீம் லீக் கட்சியின் எதிர்ப்பை அவர்கள் ஆதரித்தனர்.”
காங்கிரஸ் பதில்:
இதற்கு பதிலளித்த காங்கிரஸ் எம்பி கவுரவ் கோகாய்:
“நேருவின் வரலாற்றையும் பெருமையையும் யாராலும் அழிக்க முடியாது. காங்கிரஸ், முஸ்லிம் லீக்கை பின்தொடரவில்லை.” என்று கூறினார்.
ராகுல் – பிரியங்கா புறக்கணிப்பு:
இந்த முக்கியமான விவாதத்திலும் பிரதமர் உரையிலும், காங்கிரஸ் தலைவர்கள் ராகுல் காந்தி மற்றும் பிரியங்கா காந்தி பங்கேற்கவில்லை. அவர்களின் புறக்கணிப்பு அரசியல் வட்டாரங்களில் பரபரப்பை ஏற்படுத்தியுள்ளது.