ஹமாஸ் அமைப்பினரை குறிவைத்து, கத்தார் தலைநகர் தோஹாவில் இஸ்ரேல் நடத்திய தாக்குதல் சர்வதேச அளவில் கடும் கண்டனத்தை ஏற்படுத்தியுள்ளது. காசாவை மையமாகக் கொண்டு செயல்படும் ஹமாஸ் அமைப்பினரை ஒழிக்க, இஸ்ரேல் பல்வேறு நிலைகளில் தீவிர நடவடிக்கைகளை முன்னெடுத்து வருகிறது. தரைவழி மற்றும் வான்வழி தாக்குதல்களின் மூலம் ஹமாஸ் முக்கியத் தலைவர்களை குறிவைத்து தாக்குதல் நடத்தி வருகிறது. இதன் தொடர்ச்சியாக, தோஹாவில் ஹமாஸின் பேச்சுவார்த்தைக் குழுவை குறிவைத்து இஸ்ரேல் தாக்குதல் நடத்தியது. இந்தத் தாக்குதலில், கத்தார் பாதுகாப்பு படை வீரர் ஒருவரும், பொதுமக்கள் உள்பட ஆறு பேர் உயிரிழந்ததாக அதிகாரிகள் உறுதிப்படுத்தியுள்ளனர். எனினும், ஹமாஸ் தனது பிரதிநிதிகள் பாதிக்கப்படவில்லை என்றும் அவர்கள் பாதுகாப்பாக உள்ளனர் என்றும் அறிவித்துள்ளது.
நெதன்யாகு விளக்கம்
கடந்த 2023 அக்டோபர் 7ஆம் தேதி ஹமாஸ் நடத்திய தாக்குதலிலும், சமீபத்தில் ஜெருசலேமில் ஆறு பேர் உயிரிழந்த சம்பவத்திற்கும் பதிலடியாகவே இந்தத் தாக்குதல் நடத்தப்பட்டதாக இஸ்ரேல் பிரதமர் பெஞ்சமின் நெதன்யாகு தெரிவித்துள்ளார்.
கத்தாரின் அதிருப்தி
இந்நிலையில், இஸ்ரேல் தாக்குதல் நடத்திய பிறகே, அமெரிக்கா எச்சரித்ததாக கத்தார் பிரதமர் ஷெய்க் முகமது பின் அப்துல்ரஹ்மான் அல்தானி குற்றம்சாட்டியுள்ளார். இஸ்ரேல் மற்றும் ஹமாஸ் இடையே முக்கிய மத்தியஸ்தமாக செயல்படும் கத்தார் மீது தாக்குதல் நடத்தப்பட்டுள்ளதால், மத்திய கிழக்கு பிராந்தியத்தில் பதற்றம் மேலும் அதிகரிக்கும் சூழ்நிலை ஏற்பட்டுள்ளது.
சர்வதேச கண்டனம்
சர்வதேச விதிகளை மீறி இஸ்ரேல் தாக்குதல் நடத்தியதாக பல்வேறு நாடுகள் எதிர்ப்பு தெரிவித்து வருகின்றன. குறிப்பாக, அமெரிக்க முன்னாள் அதிபர் டொனால்டு டிரம்ப், “இது ஒரு நல்ல சூழ்நிலை அல்ல” என்று தனது அதிருப்தியை வெளிப்படுத்தியுள்ளார்.
மத்திய கிழக்கு பிராந்தியத்தில் ஏற்கனவே தீவிரமாக இருந்த பதற்றம், கத்தார் மீது நிகழ்த்தப்பட்ட இஸ்ரேல் தாக்குதலால் மேலும் தீவிரமடைந்துள்ளது. சர்வதேச சமூகமும், சமாதான பேச்சுவார்த்தைகள் கடுமையாக பாதிக்கப்படக்கூடும் என எச்சரிக்கிறது.