ஊழியர்கள் பற்றாக்குறை காரணமாக கடந்த மாதங்களில் மூடப்பட்டிருந்த அங்கன்வாடி மையங்களை மீண்டும் செயல்படுத்த தமிழக அரசு நடவடிக்கை எடுத்துள்ளது. மாநிலம் முழுவதும் மூடப்பட்ட மையங்களை மீண்டும் திறக்க அதிகாரிகள் உத்தரவிட்டுள்ளனர்.
மூடிய மையங்கள் – காரணம் மற்றும் பின்விளைவுகள்:
தமிழகத்தில் மொத்தம் 54,483 அங்கன்வாடி மையங்கள் செயல்பட்டு வருகின்றன. இவை குழந்தைகளின் ஆரம்ப பராமரிப்பு மற்றும் கல்வி தேவைகளை பூர்த்தி செய்யும் முக்கிய சமூக நலத்திட்ட மையங்களாக விளங்குகின்றன. எனினும், கடந்த காலங்களில் ஊழியர்கள் பற்றாக்குறை மற்றும் குழந்தைகள் வரத்து குறைவாக இருப்பது போன்ற காரணங்களால் பல மையங்கள் இயங்காமல் இருந்தன.
இந்த நிலையிலேயே, 2024-25ஆம் நிதியாண்டில் மட்டும் 501 மையங்கள் மூடப்பட்டன. இது பெற்றோர்களிடையே நம்பிக்கையை குலைத்ததோடு, குழந்தைகளின் அடிப்படை பராமரிப்பு மற்றும் ஊட்டச்சத்து தேவைகளும் பாதிக்கப்பட்டது.
அமைச்சர் விளக்கம்:
சம்பந்தப்பட்ட விவகாரத்தில் சமூக நலத்துறை அமைச்சர் மா. சா. கீதா ஜீவன் வெளியிட்ட அறிக்கையில்,
“மத்திய அரசின் ஒப்புதலுடன் நகரமயமாக்கல் காரணமாக குழந்தைகள் வரத்து குறைவாக உள்ள அருகருகே உள்ள இரண்டு அங்கன்வாடி மையங்களை இணைக்கும் பணி கடந்த 6 மாதங்களாக புள்ளிவிபரங்களுடன் பரிசீலிக்கப்பட்டு வருகிறது. இது மாநில அரசின் பரிந்துரையிலேயே நடைபெறும். மையங்களை நிரந்தரமாக மூடும் நோக்கமில்லை,” என தெரிவித்தார்.
மீண்டும் திறக்கப்படும் மையங்கள்:
அரசின் புதிய உத்தரவுப்படி, கடந்த மாதங்களில் மூடப்பட்டிருந்த அனைத்து மையங்களும், சென்னை மாவட்டத்தில் மட்டும் 147 மையங்கள் உட்பட, மீண்டும் செயல்படுத்தப்பட உள்ளன. தற்போது புதிதாக தேர்வு செய்யப்படும் 7,783 ஊழியர்களில் இருந்து, இந்த மையங்களுக்கு தேவையான பணியாளர்களை நியமிக்கவும் உத்தரவிடப்பட்டுள்ளது.
அங்கன்வாடி ஊழியர்களின் கருத்து:
சில ஊழியர்கள் இதுகுறித்து தெரிவித்ததாவது:
“முந்தைய காலங்களில் ஊழியர் குறைபாடு மற்றும் குழந்தைகள் வரத்து குறைவால் அருகிலுள்ள மையங்கள் இணைக்கப்பட்டன. ஆனால் இதனால் மக்கள் மற்றும் குழந்தைகள் சிரமம் அனுபவித்தனர். தற்போது மாநில அரசு மீண்டும் பழைய முறைப்படி தனித்தனியாக மையங்களை இயங்கச் செய்யும் முடிவை எடுத்துள்ளது. இது வரவேற்கத்தக்கது.” என தெரிவித்தனர்.