அமெரிக்காவில், குடியரசுக் கட்சியினர் மற்றும் ஜனநாயகக் கட்சியினர் ஆதிக்கம் செலுத்தும் இரு கட்சி முறையை சவால் செய்யும் நோக்கில், ‘அமெரிக்க கட்சி’ என்ற புதிய அரசியல் கட்சியைத் தொடங்குவதாக கோடீஸ்வர தொழிலதிபர் எலோன் மஸ்க் ஜூலை 5ம் தேதி அறிவித்தார்.
எலோன் மஸ்க், இரு முக்கிய கட்சிகளும் கட்டுப்படுத்தப்படாத அரசாங்க செலவுகள் மற்றும் ஊழல்களை செய்வதாக குற்றம் சாட்டி, “அமெரிக்கா இனி ஒரு ஜனநாயகமாக செயல்படவில்லை, மாறாக வீண்விரயம் மற்றும் சுயநலத்தால் இயக்கப்படும் ஒரு ஒருங்கிணைந்த அரசியல் இயந்திரமாக செயல்படுகிறது” என்று கூறினார். மஸ்க்கிற்கும் முன்னாள் கூட்டாளியான அமெரிக்க ஜனாதிபதி டொனால்ட் டிரம்பிற்கும் இடையிலான வியத்தகு மோதலைத் தொடர்ந்து இந்த அறிவிப்பு வெளியானது அனைவரையும் ஆச்சரியத்தில் ஆழ்த்தியுள்ளது.
மஸ்க் அமெரிக்காவிற்கு வெளியே பிறந்து ஜனாதிபதி பதவிக்கு போட்டியிட தகுதியற்றவர் என்றாலும், புதிய கட்சியை யார் வழிநடத்துவார்கள் என்பதை அவர் வெளியிடவில்லை. அமெரிக்க கட்சி அமெரிக்க தேர்தல் அதிகாரிகளிடம் முறையாக பதிவு செய்யப்பட்டுள்ளதா என்பது கூட இன்னும் தெளிவாகத் தெரியவில்லை.
ஜனாதிபதி டொனால்ட் டிரம்ப், எலோன் மஸ்க்கின் புதிய அரசியல் கட்சியை “அபத்தமானது” என்று அழைத்தார், தொழில்நுட்ப கோடீஸ்வரரைப் பற்றி புதிய விமர்சனங்களை தொடங்கினார். ஒரு காலத்தில் எலோன் மஸ்க் நாசாவை வழிநடத்த வல்லவர் என்று பெயரிட்ட டிரம்ப், இப்போது “விண்வெளியில் மஸ்க்கின் வணிக நலன்களைக் கருத்தில் கொண்டே இந்த அரசியல் மோதலை அவர் முன்வைத்திருப்பார்” என்று டிரம்ப் மேலும் கூறினார்.