அமெரிக்க அதிபர் டொனால்ட் டிரம்ப் நேற்று பாகிஸ்தான் ராணுவ தளபதி அசீம் முனீரை சந்தித்து முக்கிய ஆலோசனைகளில் ஈடுபட்டார். இந்த சந்திப்பு அமெரிக்காவில் நடைப்பெற்றது. டிரம்ப் அவருக்கு மதிய உணவை வழங்கியதுடன், இருவரும் பல்வேறு விஷயங்களை நேரடியாக விவாதித்தனர்.
இந்த சந்திப்பின் போது, பாகிஸ்தானில் உள்ள ராணுவ மற்றும் கடற்படை தளங்களை அமெரிக்கா பயன்படுத்த அனுமதிக்க வேண்டும் என டிரம்ப் கோரியதாக தகவல்கள் தெரிவிக்கின்றன. இதற்குப் பதிலாக, பாகிஸ்தானுக்கு ஐந்தாம் தலைமுறை போர் விமானங்கள், நவீன ஆயுதங்கள், நிதி உதவி மற்றும் வர்த்தக ஒப்பந்தங்களை வழங்க முடியும் எனவும் அவர் தெரிவித்துள்ளதாக கூறப்படுகிறது. இந்த “டீல்” ஒப்புக்கொள்ளப்பட்டால், அது இந்தியா மற்றும் ஈரான் இருநாடுகளுக்கும் கவலையூட்டும் அபாயங்களை உருவாக்கும் என்றே கணிக்கப்படுகிறது.
பாகிஸ்தானின் பக்கம் அமெரிக்கா?
பாகிஸ்தானுக்கு எதிரான இந்தியாவின் ‘ஆபரேஷன் சிந்தூர்’ நடவடிக்கையின் போது, பயங்கரவாதத்துக்கு ஆதரவளித்த பாகிஸ்தானுக்கு இந்தியா தக்க பதிலடி கொடுத்தது. இந்த எதிர்ப்பு நடவடிக்கையில் இந்தியா வெற்றியடைந்தது. பாகிஸ்தான் தாக்குதலை நிறுத்தத் துணிந்தது.
இந்நிலையில் பாகிஸ்தான் ராணுவ தளபதிக்கு ‘பீல்ட் மார்ஷல்’ பட்டம் வழங்கப்பட்டது. ஆனால் இந்தியா – பாகிஸ்தான் இடையே நடந்த முரண்பாடுகளில் அமெரிக்கா சீரான நிலைப்பாட்டைக் காட்டாமல், இரட்டை வேடமே போடுகிறது. இந்தியா – பாகிஸ்தான் மோதலை முடித்தது நாங்கள் தான் என டிரம்ப் அடிக்கடி பெருமை பேசுகிறார். உண்மையில் அதற்குள் அமெரிக்காவின் பங்கு மிகவும் குறைவாகவே இருந்தது.
பாகிஸ்தானுடன் டிரம்ப் நெருக்கம் – பயங்கரவாத எதிர்ப்புக்கு முரணான நிலை
“அமெரிக்கா பயங்கரவாதத்தை ஏற்காது” என வெளியில் கூறும் டிரம்ப், கடந்த ஒரு வருடமாக பாகிஸ்தானுடன் நெருக்கமாக நடந்து கொண்டிருப்பது விவாதத்திற்கு இடமளிக்கிறது. நேற்று அசீம் முனீருக்கு வழங்கப்பட்ட மதிய விருந்தும், பின்னர் நடந்த ஆலோசனைகளும் இதற்குச் சாட்சியமளிக்கின்றன.
டிரம்ப், பாகிஸ்தானில் உள்ள ராணுவ தளங்கள் மற்றும் கடற்படை தளங்களை அமெரிக்கா பயன்படுத்த அனுமதிக்க வேண்டும் என முன்மொழிந்துள்ளார். இந்தக் கோரிக்கைக்கு பாகிஸ்தான் சம்மதித்தால், அமெரிக்கா சார்பில் பல ரகப்பட்ட உதவிகள் வழங்கப்படும் – அதில் முக்கியமாக 5ம் தலைமுறை போர் விமானங்கள், நிதி உதவிகள், பாதுகாப்பு மற்றும் வர்த்தக ஒப்பந்தங்கள் அடங்கும்.
இந்தியா – ஈரான் கவலைக்கேடான சூழ்நிலை
இந்த ஒப்பந்தம் நிறைவேறினால், பாகிஸ்தானின் இடம் மற்றும் முக்கியத்துவம் காரணமாக, ஈரான் மீது அமெரிக்கா தாக்குதல் நடத்த கூடிய நிலை உருவாகும். ஏனெனில், பாகிஸ்தான் – ஈரான் எல்லையை பகிர்ந்து கொள்கின்றன. அமெரிக்காவுக்கும் ஈரானுக்கும் பல ஆண்டுகளாகவே தீவிர எதிர்ப்புகள் இருந்து வருகின்றன.
இஸ்ரேல் – ஈரான் மோதலில், அமெரிக்கா ஈரானுக்கு எதிரான கடும் நிலைப்பாட்டில் உள்ளது. டிரம்ப், ஈரான் தலைவரான அயதுல்லா அலி கமேனியை இஸ்ரேலிடம் சரணடைய வேண்டும் என வற்புறுத்தினார். ஆனால் ஈரான் அதை நிராகரித்துவிட்டது.
இதற்கிடையில், ஈரான் அணு ஆயுதம் தயாரிப்பதை அமெரிக்கா தொடர்ந்து எதிர்த்து வருகிறது. பேச்சுவார்த்தைகள் நடைபெற்றாலும், ஈரான் தன் நிலைப்பாட்டில் இருந்து பிறழவில்லை. இந்த நிலையில், அமெரிக்கா பாகிஸ்தானில் ராணுவ தளங்களை கொண்டு ஈரான் மீது தாக்குதல் நடத்தும் சாத்தியத்தையும் எதிர்பார்க்கலாம்.
இந்தியாவின் பாதுகாப்பு மீது தாக்கம்?
இவ்வாறு பாகிஸ்தானுக்கு 5ம் தலைமுறை விமானம், நிதி உதவி போன்றவைகளை வழங்குவதாக அமெரிக்கா முன்வைப்பது, இந்தியாவின் பாதுகாப்பு நிலைமையை பெரிதும் பாதிக்கும்.
முன்னாள் அமெரிக்க அதிபர் ஜோ பைடன் ஆட்சிக் காலத்தில், பாகிஸ்தானுடன் அமெரிக்கா நெருக்கம் காட்டவில்லை. 4 ஆண்டுகளில் பாகிஸ்தான் பிரதிநிதிகளை கூட அவர்கள் சந்திக்கவில்லை. ஆனால் டிரம்ப், ஆசியாவில் அமெரிக்காவின் தாக்கத்தை உயர்த்துவதற்காக பாகிஸ்தானை முக்கிய பங்காளியாக மாற்ற முயற்சி செய்து வருகிறார். இதன் ஒரு பகுதியாகவே அசீம் முனீருடன் நடந்த இந்த சந்திப்பும் இடம்பெற்றதாக கூறப்படுகிறது.
இந்தியா & ஈரானுக்கு எச்சரிக்கையா?
பாகிஸ்தானின் ராணுவ மற்றும் கடற்படை தளங்களை பயன்படுத்த அமெரிக்கா சம்மதம் பெறுவதாக தகவல்கள் உறுதி செய்யப்படுகின்றன. இதற்குப் பதிலாக, அமெரிக்கா தரப்பில் ஆயுதங்கள், நிதி உதவி, வர்த்தக ஒப்பந்தங்கள் வழங்கப்படும் என உறுதி அளிக்கப்பட்டுள்ளது. இது ஒரு “பெரும் சதி” என இந்தியா மற்றும் ஈரான் தரப்பில் பார்க்கப்படுகிறது.