வடகிழக்கு கஜகஸ்தானின் பரந்த புல்வெளிகளின் அடியில், சுமார் 3,500 ஆண்டுகளாக புதைந்திருந்த மிகப்பெரும் நாகரிகத்தின் தடயங்கள் அசாதாரணமான தொல்லியல் கண்டுபிடிப்பாக வெளிச்சத்திற்கு வந்துள்ளன. வெண்கலக் காலத்தைச் சேர்ந்த, மிகப் பெரிய மற்றும் திட்டமிட்டு அமைக்கப்பட்ட பழமையான ‘செமியார்கா’ (Semiyarka) எனப்படும் இந்த நகரம் உலக வரலாற்றை மாற்றி அமைக்கும் வகையில் முக்கியத்துவம் வாய்ந்ததாக நிபுணர்கள் கூறுகின்றனர்.
சர்வதேச அளவில் பரபரப்பு ஏற்படுத்திய கண்டுபிடிப்பு:
லண்டன் மற்றும் கஜகஸ்தான் பல்கலைக்கழகங்களை சேர்ந்த தொல்லியல் ஆராய்ச்சியாளர்கள் குழுவின் கூட்டு முயற்சியால், சுமார் 140 ஹெக்டேர் பரப்பளவைக் கொண்ட இந்த நகரம் முறையாக ஆய்வு செய்யப்பட்டு, அதன் மர்மங்கள் உலகிற்கு வெளியிடப்பட்டுள்ளன. ‘ஏழு பள்ளத்தாக்குகளின் நகரம்’ என்ற பொருள்படும் செமியார்கா, கஜகஸ்தான் பகுதியில் இதுவரை கண்டறியப்பட்ட மிகப் பெரிய திட்டமிடப்பட்ட குடியிருப்பாக திகழ்கிறது.
இந்தக் கண்டுபிடிப்பு, கி.மு. 1,600 காலக்கட்டத்தில் மக்கள் நாடோடிகளாக மட்டுமே வாழ்ந்தனர் என்ற பொதுவான வரலாற்று நம்பிக்கையை முறியடிக்கிறது. தற்காலிக முகாம்கள் என கற்பிக்கப்பட்ட அந்தக் காலகட்டத்தில், இத்தகைய பிரம்மாண்ட நகரம் இருந்தது வரலாற்றாளர்களை ஆச்சரியத்தில் ஆழ்த்தியுள்ளது.
ஒழுங்கமைக்கப்பட்ட நகர அமைப்பு, தொழில்துறை மையம்:
செமியார்காவில் வரிசையாக அமைக்கப்பட்டிருந்த பெரிய மண் மேடுகள் பல அறைகள் கொண்ட வீடுகளின் அமைப்பை வெளிப்படுத்துகின்றன. நகரின் குறுக்குவட்ட மையத்தில் சமூகக் கூடம் அல்லது வழிபாட்டுத் தளம் என கருதப்படக்கூடிய பிரம்மாண்டமான கட்டிட அமைப்பு கண்டறியப்பட்டுள்ளது. இத்தகைய பெரிய அளவிலான கட்டுமானம், சமூக அமைப்பிலும் நிர்வாக ஒழுங்கிலும் அவர்களின் திறமையை வெளிப்படுத்துகிறது.
இந்த நகரத்தின் மிகப் பெரிய சிறப்பம்சம் ‘தொழில்துறை மண்டலம்’ (Industrial Zone) ஆகும். வெண்கலம் உருவாக்கப் பயன்படுத்தப்படும் தகரம் கலவை உற்பத்திக்கென தனி மண்டலம் ஒதுக்கப்பட்டிருப்பது, அந்தக் காலத்தில் மிகப்பெரிய தொழில் செயல்பாடுகள் நடந்ததற்கான முதல் சான்றாகக் கருதப்படுகிறது. உலைக்கலன்கள், உலோகக் கழிவுகள், வெண்கல கருவிகள் உள்ளிட்டவை அப்போது இருந்த தொழில்நுட்ப முன்னேற்றத்தை காட்டுகின்றன.
வரலாற்றைப் புரட்டும் கண்டுபிடிப்பு:
“இது கடந்த சில தசாப்தங்களிலேயே மிக முக்கியமான தொல்லியல் கண்டுபிடிப்புகளில் ஒன்று” என்று தலைமை ஆய்வாளர் டாக்டர் மில்ஜானா ராடிவோஜெவி உறுதியாகக் கூறுகிறார். “நாடோடி சமூகங்கள் கூட தொழில்நுட்ப மையங்களை அமைத்து, உண்மையான நகரங்களை உருவாக்க முடியும் என்பதை இது நிரூபிக்கிறது,” என அவர் வலியுறுத்துகிறார்.
புத்தி ரீதியான இட அமைப்பு, வர்த்தக வலிமை:
இந்நகரம் இர்திஷ் நதியை நோக்கிய உயரமான பகுதியில், செம்பு மற்றும் தகரம் நிறைந்த அல்தாய் மலைகளுக்கு அருகில் அமைந்துள்ளது. இந்த புவியியல் அமைப்பு, அந்தக் காலத்தில் செமியார்காவை பிராந்திய சக்தியாகவும், தொலைதூர வர்த்தக மையமாகவும் மாற்றியிருக்கலாம் என்று நிபுணர்கள் கூறுகின்றனர். இங்கு “அலெக்ஸீவ்கா-சர்காரி” மக்களும், ‘செர்காஸ்குல்’ போன்ற பிற நாடோடி சமூகங்களுடனும் வலுவான வர்த்தக மற்றும் பண்பாட்டு பரிமாற்றத்தில் ஈடுபட்டிருந்தனர் என்பதற்கான சான்றுகளும் கண்டெடுக்கப்பட்டுள்ளன.
புதிய வரலாற்றின் கதவுக்கு திறவுகோல்:
செமியார்காவின் கண்டுபிடிப்பு, புல்வெளி நாகரிகத்தின் போக்கைப் புரிந்து கொள்ள புதிய கதவுகளைத் திறந்துவைத்திருக்கிறது. இதுவரை அறியப்படாத பல ரகசியங்கள் இன்னும் மண்ணுக்குள் புதைந்திருக்கின்றன எனக் கருதப்படுகிறது. உலக தொல்லியல் சமூகத்தின் கவனம் தற்போது முழுமையாக இந்தப் பகுதியில் திரும்பியுள்ளது.
எதிர்வரும் ஆய்வுகள் யூரேசிய வரலாற்றின் மிகப்பெரிய புதிர்களைத் தீர்க்கக்கூடும் என்பதால், அறிவியல் உலகம் மிகுந்த எதிர்பார்ப்புடன் காத்திருக்கிறது.